وریا حەمەکەریم
وریا حەمەکەریم | |
|---|---|
 | |
| لەدایکبوون | ١٩٨٧ |
| مەرگ | ٦ی شوباتی ٢٠٢٥ (٣٧–٣٨ ساڵ ژیاوە) ڕێگای سلێمانی–عەربەت، پارێزگای سلێمانی، ھەرێمی کوردستان |
| ھۆکاری مەرگ | ڕووداوی ھاتووچۆ |
| شوێنی گۆڕ | گۆڕستانی گوڵان، ھەڵەبجە |
| نەتەوە | کورد |
| شارۆمەندێتی | عێراق |
| پیشە | ڕۆژنامەنووس، پێشکەشکار |
| چالاکبوون | نز. ٢٠١٣–٢٠٢٥ |
| ناسراوە بە | وریا حەمەکەریم |
کارە ناودارەکان | بەرنامەی «گەڕیدە»، ڕاپۆرتە لێکۆڵینەوەییەکان |
| تەلەڤیزیۆن | ئێن ئاڕ تی، کەناڵی پەیام |
| مناڵ(ەکان) | ٢ (کوڕێک و کچێک؛ محەممەد و ترێ) |
وریا حەمەساڵح ناسراو بە وریا حەمەکەریم (١٩٨٧ لە ھەڵەبجە – ٦ی شوباتی ٢٠٢٥ لەسەر ڕێگای سلێمانی–عەربەت) ڕۆژنامەنووس، پەیامنێر و پێشکەشکارێکی دیاری کورد بوو کە بۆ ماوەی زیاتر لە ١٢ ساڵ لە دەزگای میدیاییی نالیا (ئێن ئاڕ تی) کاری کرد.[١][٢] ئەو بە بەرنامە کۆمەڵایەتییەکانی، بەتایبەت بەرنامەی گەڕیدە و ڕاپۆرتە لێکۆڵینەوەییەکانی لەسەر گەندەڵی ناسرابوو.[٣] کۆچی دواییەکەی لە ڕووداوێکی ھاتوچۆی دڵتەزێندا کاردانەوەیەکی بەرفراوانی لەسەر ئاستی ھەرێمی کوردستان لێکەوتەوە و بووە ھۆی ئاشکرابوونی دۆسیەیەکی گەورەی قاچاخچێتیی بەرھەمی کشتوکاڵی.[٤]
ژیانی سەرەتایی و خێزان
[دەستکاری]وریا حەمەکەریم لە ساڵی ١٩٨٧ لە شاری ھەڵەبجە لەدایک بووە.[١] باوکی، حەمەساڵح، یەکێک بووە لە شەھیدانی خۆپیشاندانەکانی ساڵی ١٩٨٧ لە ھەڵەبجە و شارەزوور.[٥][٦] وریا خۆی یەکێک بوو لە بەرکەوتووانی کیمیابارانی ھەڵەبجە و تاقانەی دایکی بوو.[١][٧] بەپێی ھەندێک سەرچاوە، لە کاتی کیمیابارانەکەدا بۆ ماوەی ھەشت مانگ ون بووە و دواتر لە نەخۆشخانەیەکی تاران لەلایەن خاڵیەوە بەھۆی نیشانەیەک لەسەر ڕوومەتی دۆزراوەتەوە.[٨]
ژیانی ھاوسەرگیریی پێکھێنابوو و باوکی دوو منداڵ بوو بە ناوەکانی محەممەد و ترێ.[٩]
پیشەی ڕۆژنامەوانی
[دەستکاری]وریا حەمەکەریم ماوەی زیاتر لە ١٢ ساڵ لە بواری میدیادا کاریکرد.[١٠] دەستپێکی کاری میدیایی لە کەناڵی پەیام بوو،[١١] دواتر وەک پەیامنێر و بەرپرسی نووسینگەی کەناڵی ئێن ئاڕ تی لە سنووری پارێزگای ھەڵەبجە دەستبەکاربوو.[١٢][١٣] ئەو بە کەسایەتییەکی ڕووخۆش، قسەخۆش و نزیک لە خەڵک ناسرابوو.[١]
بەرنامەی «گەڕیدە»
[دەستکاری]لە وەرزی نوێی کەناڵی ئێن ئاڕ تی، وریا بووە پێشکەشکاری بەرنامەی گەڕیدە.[١] لەم بەرنامەیەدا، سەردانی شار و شارۆچکەکانی ھەرێمی کوردستان و ناوچە دابڕاوەکانی دەکرد و ڕاستەوخۆ کێشە و داواکارییەکانی ھاووڵاتیانی دەخستەڕوو. بەرنامەکە بە خێرایی بووە یەکێک لە پڕبینەرترین بەرنامەکانی کەناڵەکە.[١٤]
ڕۆژنامەوانیی لێکۆڵینەوەیی و کێشە یاساییەکان
[دەستکاری]وریا حەمەکەریم بە بوێری و دەستبردن بۆ دۆسیە ھەستیارەکانی گەندەڵی ناسرابوو. بەپێی وتەی ھاوکارەکانی، ئەو پەردەی لەسەر چەندین کەیسی گەندەڵی و نایاسایی لە سنووری پارێزگای ھەڵەبجە ھەڵدابووەوە.[١٥] بەھۆی کارەکانیەوە، زیاتر لە ١٠ جار ڕووبەڕووی گرتن و دادگاییکردن بووەوە و تا کاتی کۆچی دواییشی ھەندێک لە دۆسیەکانی لە دادگا یەکلایی نەکرابوونەوە.[١]
کۆچی دوایی
[دەستکاری]وریا حەمەکەریم لە بەرەبەیانی ڕۆژی پێنجشەممە، ٦ی شوباتی ٢٠٢٥، لە تەمەنی ٣٧ ساڵیدا لە ڕووداوێکی ھاتوچۆ لەسەر ڕێگای سلێمانی–عەربەت گیانی لەدەستدا.[١٦]
وردەکاریی ڕووداوەکە
[دەستکاری]ڕووداوەکە لە بەرەبەیانێکی سارد و کڕێوەدا،[١٧] نزیکەی کاتژمێر ٥:٣٠ی بەیانی ڕوویدا.[١٨] ئۆتۆمبێلی ھاووڵاتییەک بە ناوی ئارام فەتاح، کە یاریزان و پاڵەوانی لەشجوانیی عێراق بوو، لەسەر ڕێگاکە لەکارکەوتبوو.[١٩] وریا حەمەکەریم کە لە ھەڵەبجەوە بەرەو سلێمانی بەڕێگاوە بوو، بۆ مەبەستی یارمەتیدان لە ئۆتۆمبێلەکەی دابەزیبوو. لە کاتی سەرقاڵبوونیان بە چارەسەرکردنی کێشەکە، ئۆتۆمبێلێکی بارھەڵگر کە شۆفێرەکەی بە ڕەچەڵەک ئێرانی بوو، کۆنترۆڵی لەدەستدا و خۆی کێشا بە ھەردووکیاندا، کە بووە ھۆی گیانلەدەستدانی دەستبەجێی وریا حەمەکەریم و ئارام فەتاح.[٢٠][٢][٢١]
بەخاکسپاردن
[دەستکاری]تەرمی وریا حەمەکەریم کاتژمێر ٦ی بەیانی گەیەندرایە پزیشکی دادی سلێمانی.[٢٢] دواتر گەڕێندرایەوە بۆ زێدی خۆی لە ھەڵەبجە و لەلایەن ھاوڕێ و ھاوپیشەکانییەوە لە دەروازەی شار پێشوازی لێکرا.[٢٣] ھەر لە ھەمان ڕۆژدا، دوای نوێژی مردووان، لە گۆڕستانی گوڵان لە ھەڵەبجە بە ئامادەبوونی جەماوەرێکی زۆر بەخاک سپێردرا.[٢٤]
دەرەنجام و کاردانەوەکان
[دەستکاری]ئاشکرابوونی باری قاچاخ
[دەستکاری]ڕووداوی گیانلەدەستدانی وریا حەمەکەریم دۆسیەیەکی گەورەی گەندەڵی و قاچاخچێتیی ئاشکرا کرد. دەرکەوت ئەو بارھەڵگرەی بووە ھۆی ڕووداوەکە، نزیکەی ٤٠ تەن تەماتەی بەشێوەی قاچاخ و نایاسایی ھەڵگرتبوو.[٢٥][٢٦] ئەمە لە کاتێکدا بوو کە وەزارەتی کشتوکاڵی ھەرێمی کوردستان نزیکەی دوو ھەفتە پێشتر بە فەرمی ھاوردەکردنی تەماتەی قەدەغە کردبوو بۆ پاراستنی بەرھەمی ناوخۆیی.[٢٧][٢٨] ڕێکخراوی جوتیاران و لایەنە پەیوەندیدارەکان ڕایانگەیاند کە ئەم جۆرە بەرھەمانە بەبێ پشکنینی کوالێتی و تەندروستی دەھێندرێنە ھەرێم.[٢٩]
دواتر دۆسیەکە ڕەھەندی سیاسی وەرگرت، کاتێک ماڵپەڕی «وشە» و پەرلەمانتار عەلی حەمەساڵح ئیدیعایان کرد کە کرێی ھێنانی بارە قاچاخەکە ٣٠٥٠ دۆلار بووە و کاری قاچاخچێتی لەو سنوورەدا پەیوەستە بە بەرپرسانی یەکێتیی نیشتمانیی کوردستان و گرووپە چەکدارەکانەوە.[٣٠]
ڕەوتی دادگاییکردن
[دەستکاری]پۆلیسی سلێمانی لێکۆڵینەوەی لە دوو قۆناغدا دەستپێکرد: یەکەمیان لەسەر ڕووداوی ھاتوچۆکە و دووەمیان لەسەر پرسی بارە قاچاخەکە.[٣١] دوای نزیکەی شەش مانگ لە ڕووداوەکە، یەکەم دانیشتنی دادگاییکردنی شۆفێری بارھەڵگرەکە لە دادگای سلێمانی بەڕێوەچوو. دۆسیەکە کە لە بنەڕەتدا لە دادگای شارەزوور بوو، گواسترابووەوە بۆ سلێمانی. لە دانیشتنەکەدا، دوای وەرگرتنی زانیاریی کەسیی تۆمەتبار و گوێگرتن لە وتەی بنەماڵەی قوربانییەکان، دادگا بڕیاریدا بەردەوامی بە ڕەوتی دادگاییکردنەکە بدات و دانیشتنی دواتری بۆ ١٩ی ھەمان مانگ دواخست.[١٧]
کاردانەوەکان
[دەستکاری]کۆچی دوایی وریا حەمەکەریم کاردانەوەی بەرفراوانی لەسەر ئاستی ھەرێم و لەنێو ڕۆژنامەنووسان، ھاووڵاتیان و کەسایەتییە سیاسی و ئیدارییەکاندا ھەبوو.
- دەزگای میدیایی نالیا (NRT): ماتەمینیی قووڵی خۆی ڕاگەیاند و گیانلەدەستدانی بە «کەلێنێکی گەورە» ناوبرد.[٣٢] بڕیاریدا کە مووچەی وریا بۆ منداڵەکانی بەردەوام بێت[٣٣] و بەرنامەی «گەڕیدە»ش بە ناوی ئەوەوە بمێنێتەوە و چیتر پێشکەش نەکرێت.[١٤]
- سەندیکای ڕۆژنامەنووسانی کوردستان: لە پەیامێکدا وریایان بە «ڕۆژنامەنووسێکی ڕۆح سووک، زیرەک و چالاک» وەسف کرد کە «بەرھەمەکانی دانسقەبوون».[٣٤]
- ڕۆژنامەنووسان: لە شارەکانی سلێمانی، ھەولێر و ھەڵەبجە مەراسیمی ماتەمینی و یادکردنەوەیان بۆ ساز کرد و گیانلەدەستدانیان بە «کەلێنێکی گەورە لە میدیای کوردیدا» ناوبرد.[٣٥][٣٦]
ھەڵوێستی بنەماڵەکەی
[دەستکاری]لە ڕووداوێکی مرۆیی دەگمەندا، کەسوکاری شۆفێری ئەو بارھەڵگرەی بووە ھۆی ڕووداوەکە، بەشدارییان لە پرسەی وریا حەمەکەریمدا کرد. بنەماڵەی وریا لێخۆشبوونی خۆیان بۆ شۆفێرەکە ڕاگەیاند و ئەم ھەڵوێستەیان وەک «نیشانەی برایەتی» وەسف کرا.[٣٧]
میرات و یادکردنەوە
[دەستکاری]- چلەی ماتەمینی: لە شاری ھەڵەبجە بە ئامادەبوونی کەسوکار و ڕۆژنامەنووسان مەراسیمی چلەی ماتەمینی بۆ بەڕێوەچوو.[٣٨]
- کتێبی «گەوھەری ناو سەدەف»: نووسەر و ھاوڕێی، ئارام شەمێرانی، کتێبێکی بەڵگەنامەیی لەسەر ژیان و کارەکانی وریا بە ناوی گەوھەری ناو سەدەف ئامادە کرد و ھەزار دانەی لێ چاپکرا و بەسەر ھاوڕێیان و بنەماڵەکەیدا دابەشکرا.[٣٩][٤٠]
- بەرھەمە ھونەرییەکان:
- گۆرانیی «بۆ وریا»: ھونەرمەند میران عەلی گۆرانییەکی بەم ناوە پێشکەش بە ڕۆحی وریا کرد.[٤١]
- سروودی «ھەڵەبجەی یار»: سروودێکی نوێ بۆ یادی کیمیابارانی ھەڵەبجە، لە ئاوازی ھونەرمەند ئەنوەر قەرەداغی، پێشکەش بە ڕۆحی وریا حەمەکەریم کرا.[٤٢]
- دروستکردنی مزگەوت: جووڵانەوەی نەوەی نوێ بە سەرۆکایەتیی شاسوار عەبدولواحید بڕیاریدا لە شوێنی ڕووداوەکە مزگەوتێک بە ناوی وریا حەمەکەریمەوە دروست بکات.[٤٣]
- شینبوونی تەماتەکان: دوای ماوەیەک لە ڕووداوەکە، لە شوێنی ڕژانی تەماتە قاچاخەکان، تۆوی تەماتەکان بە شێوەی خۆڕسک شین بوون. ئەم دیمەنە لەلایەن میدیاکارانەوە وەک «خێر و بەرەکەت» بۆ ڕۆحی وریا و ھاوڕێکەی وەسف کرا.[٤٤]
سەرچاوەکان
[دەستکاری]- 1 2 3 4 5 6 «خەرمانێک لە ژیانی وریا حەمەکەریم و کارەکانی». nrttv.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- 1 2 «وریا حەمەکەریم له ڕوداوێكی هاتوچۆدا گیانی لهدهستدا». xendan.org. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «وریا حەمەکەریم ماڵئاوایی کرد و باران چووە ناو خێمەی مانگرتووانەوە». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «وریا حەمەکەریم، بە مەرگیشى قاچاخچێتییەکى ئاشکرا کرد». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «ئێن ئاڕتی داوا دەکات هیچ کەس و لایەنێک مردنی وریا حەمە کەریم بۆ ڕاکێشانی سۆز بەکارنەهێنێت». www.westganews.net. ٧ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «میدیاکار وریا حەمەکەریم بە ڕووداوی هاتووچۆ گیانی لەدەست دا». AVA News. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «رۆژنامەنووس وریا حەمەکەریم بە رووداوێکی هاتوچۆ گیانی لەدەستدا». Zoom News. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «رۆژنامەنووس و پەیامنێری ئێن ئار تی وریا حەمەکەریم کۆچی دوایی کرد». speemedia.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «دواین ماڵئاوایی ھاوڕێ و ھاوپیشەکانی وریا حەمەکەریم لەسەر گۆڕەکەی». ku.964media.com. ٨ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «رۆژنامەنووس وریا حەمەکەریم لە رووداوێکی هاتوچۆدا گیانیلەدەستدا». esta.krd. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «کەناڵی ئاسیمانی پەیام پرسەنامەیەك بە بۆنەی گیانی لەدەستدانی وریا حەمەكەریم بڵاو دەكاتەوە». peyam.net. ٦ی شوباتی ٢٠٢٥. لە ٥ی ئابی ٢٠٢٥ ھێنراوە.
- ↑ «ڕاگهیهنراوی هاتووچۆ لهسهر ڕووداوهكهی ئهمڕۆی نێوان عهربهت-سلێمانی». peyam.net. ٦ی شوباتی ٢٠٢٥. لە ٥ی ئابی ٢٠٢٥ ھێنراوە.
- ↑ «لە ڕووداوێکی هاتوچۆدا ڕۆژنامەنووس وریا حەمەکەریم گیانی سپارد». kurdistan24.net. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- 1 2 «کەی کۆتا بەرنامەی گەڕیدەی وریا حەمەکەریم لە ئێن ئاڕتی پەخشدەکرێت؟». nrttv.com. ٩ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «بەڕێوەبەر و پێشکەشکارانی NRT چی لەسەر وریا حەمە کەریم دەڵێن». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «میدیاکارێکی دیاری NRT گیانی لەدەست دا». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- 1 2 «زانیاری نوێ لەبارەی کەیسی گیانلەدەستدانی وریا حەمەکەریم». nrttv.com. ٢ی ئابی ٢٠٢٥. لە ٥ی ئابی ٢٠٢٥ ھێنراوە.
- ↑ «رۆژنامەنوس، وریا حەمەکەریم لە روداوێکى هاتوچۆدا گیانى لەدەستدا». knnc.net. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «پرسەى ئەو پاڵەوانەى لەگەڵ وریا حەمەکەریم گیانى لەدەستدا». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «وردەکاری رووداوی گیان لەدەستدانی وریا حەمەکەریم». westganews.net. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «رۆژنامەنووس وریا حەمەكەریم بە روداوی هاتووچۆ گیانی لەدەستدا». news.kurdsat.tv. ٦ی شوباتی ٢٠٢٥. لە ٥ی ئابی ٢٠٢٥ ھێنراوە.[بەستەری مردوو]
- ↑ «وردەکاری گیانلەدەستدانی هاوکارمان وریا حەمەکەریم». nrttv.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «وریا حەمە کەریم بۆ دواینجار دەگاتەوە هەڵەبجە». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «گۆڕستانی گوڵان بوو بە دوا مەنزڵگەی وریا حەمە کەریم». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «"ئەو بارهەڵگرەی میدیاکار و هاوڵاتییەکەی کوشت تەماتەی قاچاغی پێ بوو"». ku.964media.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «مەرگی وریا حەمەکەریم قاچاخییەکی گەورە ئاشکرادەکات». sharpress.net. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «ڕێکخراوی جوتیاران: ئەو بارهەڵگرەی بوە هۆی گیانلەدەستدانی وریا حەمەکەریم باری قاچاغی پێبوە». xendan.org. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «بارێكی قاچاخ هۆكاری گیان لەدەستدانی وریا حەمەكەریم بوو». wishe.net. ٦ی شوباتی ٢٠٢٥. لە ٥ی ئابی ٢٠٢٥ ھێنراوە.
- ↑ «زانیاری لەبارەی ئەو بارهەڵگرەی بووە هۆی رووداوی گیان لەدەستدانی 'وریا حەمەکەریم'». nrttv.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «مانگرێكی خێمەكە بە مەرگی رۆژنامەنووس وریا تۆمەتبار دەكرێت». wishe.net. ٦ی شوباتی ٢٠٢٥. لە ٥ی ئابی ٢٠٢٥ ھێنراوە.
- ↑ «کەس لە بارە قاچاخەکەى نەپرسییەوە؛ پۆلیس بە دوو قۆناغ لێکۆڵینەوە لەرووداوى گیانلەدەستدانى وریا حەمەکەریم دەکات». sbey.net. ٢٠ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «وریا حەمە کەریم بە رووداوێکی هاتووچۆ گیانی لەدەستدا». nrttv.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «کەناڵی ئێن ئاڕ تی: مووچەی وریا حەمەکەریم بەردەوام دەبێت بۆ منداڵەکانی». nrttv.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «سەندیکای رۆژنامەنووسان: وریا رۆژنامەنووسێکی رۆح سوک و زیرەک و چالاک بوو بەرهەمەکانی دانسقەبوون». nrttv.com. ٦ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «هاوڕێ و هاوکارانی وریا حەمەکەریم ماتەمیان گێڕا». ku.964media.com. ١٠ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «رۆژنامەنووسانی هەولێر بۆ گیان لەدەستدانی 'وریا حەمەکەریم' ماتەمینیان راگەیاند». nrttv.com. ٨ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «کەسوکاری شۆفێری ئەو بارهەڵگرەی بووە هۆی گیان لەدەستدانی وریا حەمەکەریم؛بەشداری پرسەکەیان کرد». nrttv.com. ٧ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «سبەینێ چلەى وریا حەمەکەریم بەڕێوەى دەچێت». ku.964media.com. ١٧ی ئازاری ٢٠٢٥. لە ٢ی ئابی ٢٠٢٥ ھێنراوە.
- ↑ «ئارام شەمێرانی کتێبێک دەربارەی ژیانی وریا حەمەکەریم دەنووسێت». ku.964media.com. ١٤ی نیسانی ٢٠٢٥. لە ٢ی ئابی ٢٠٢٥ ھێنراوە.
- ↑ «کتێبێ گەوهەری ناو سەدەف تایبەت بە ژیانی وریا حەمەکەریم بڵاوکرایەوە». ku.964media.com. ١٤ی ئایاری ٢٠٢٥. لە ٢ی ئابی ٢٠٢٥ ھێنراوە.
- ↑ «میران عەلی گۆرانی بۆ مەرگی وریا حەمەكەریم دەڵێت». xendan.org. ١٣ی شوباتی ٢٠٢٥. لە ٥ی ئابی ٢٠٢٥ ھێنراوە.
- ↑ «سروودێکی نوێ بۆ یادکردنەوەی قوربانییانی هەڵەبجە بەرهەمدەهێنرێت». AVA News. ٢٢ی شوباتی ٢٠٢٥. لە ٥ی ئابی ٢٠٢٥ ھێنراوە.
- ↑ «لە شوێنی گیان لەدەستدانی وریا حەمەکەریم شاسوار عەبدولواحید مزگەوتێک دروستدەکات». nrttv.com. ١١ی شوباتی ٢٠٢٥. لە ٢ی ئابی ٢٠٢٥ ھێنراوە.
- ↑ «وریا حەمەكەریم بە مردووییش هەر خێر و بەرەكەتە». ku.964media.com. ١٦ی ئایاری ٢٠٢٥. لە ٢ی ئابی ٢٠٢٥ ھێنراوە.
