ناسر بەکرزادە

وێنەیەکی ناسر بەکرزادە، بەندکراوی سیاسیی لەسێدارەدراوی کورد

ناسر بەکرزادە (١٩٩٩/٢٠٠٠ – ٢ی ئایاری ٢٠٢٦ لە ورمێ) بەندکراوێکی سیاسیی کوردی ٢٦ ساڵە بوو کە بە تۆمەتی سیخوڕی بۆ ئیسرائیل لە بەندیخانەی ورمێ بەند کرابوو. سزای لەسێدارەدانی لە ٢ی ئایاری ٢٠٢٦ لە کاتی بانگی بەیانیدا جێبەجێ کرا. بەکرزادە تەواوی تۆمەتەکانی سەر خۆی ڕەت کردەوە و لە فایلێکی تۆمارکراوی دەنگیدا وتی کە تاکە تاوانی کوردبوون و سوننەبوونییەتی و داوای بەھاناوەچوونی کرد.

گرتن و لەسێدارەدان

ناسر بەکرزادە

ناسر بەکرزادە لە ڕێکەوتی ٩ی ئابی ٢٠٢٣ (١٨ی گەلاوێژی ١٤٠٢ی ھەتاوی)دا لەلایەن ھێزەکانی ھەواڵگریی سوپای پاسدارانەوە لە ورمێ دەستبەسەر کرا و پاش چەند حەفتە دوای «وەرگرتنی بەڵێنی» بە شێوەی کاتی ئازاد کرا. ئەو لە ڕێکەوتی ٢ی کانوونی دووەمی ٢٠٢٤ (١٢ی بەفرانباری ١٤٠٢ی ھەتاوی)دا، جارێکی دیکە لەلایەن ھێزەکانی ھەواڵگریی سوپای پاسدارانەوە لە ورمێ دەستبەسەر کرایەوە و دوای تێپەڕبوونی چەند مانگ لێکۆڵینەوە لەژێر گوشاردا، بە بەندیخانەی ناوەندیی ورمێ گواسترایەوە. ئەو لە کاتی بەندکراندا بە مەبەستی وەرگرتنی دانپێدانانی زۆرەملێ، کەوتە ژێر گوشار و لە مافە سەرەتاییەکانی خۆی وەکوو دەستگەیشتن بە پارێزەر و دیتنی خێزانەکەی بێبەش کرابوو.

بەکرزادە لە ڕێکەوتی ٢ی تشرینی دووەمی ٢٠٢٤ (١٢ی خەزەڵوەری ١٤٠٣ی ھەتاوی)دا، لەلایەن لقی ٣ی دادگای شۆڕشی ورمێ بە سەرۆکایەتیی دادوەر نەجەفزادە بە تۆمەتی «سیخوڕی لە بەرژەوەندیی ئیسرائیل»، بۆ یەکەمین جار سزای لەسێدارەدانی بۆ دەرکرا. سزای لەسێدارەدان لە نیسانی ٢٠٢٥ (خاکەلێوەی ١٤٠٢ی ھەتاوی) ڕەت کرایەوە و لەلایەن لقی ٣٩ی دادگای باڵای وڵاتەوە بۆ لقی پلەی یەکسان نێردرا. دواتر دۆسیەکە بۆ لقی نوێ (بە پلەی یەکسان لە ڕووی یاساییەوە) نێردرا و لە کۆتاییدا لە تەممووزی ٢٠٢٥ (گەلاوێژی ١٤٠٤ی ھەتاوی)دا، لەلایەن لقی ٢ی دادگای شۆڕشی ئیسلامیی ورمێ بە سەرۆکایەتیی دادوەر شاھینییەوە بە تۆمەتی «سیخوڕی بۆ ئیسرائیل»، جارێکی دیکە سزای سێدارەی لەسەر سەپێنرایەوە و چووە ناو ڕیزی لەسێدارەدانەوە.

لە ڕێکەوتی ١ی تشرینی دووەمی ٢٠٢٥ (١٠ی خەزەڵوەری ١٤٠٤ی ھەتاوی)دا، سزای لەسێدارەدانی ناسر بەکرزادە بۆ جاری دووەم لەلایەن لقی ٣٩ی دادگای باڵای وڵاتەوە ڕەت کرایەوە.

ناسر بەکرزادە دوای دوو جار ھەڵوەشانەوەی سزای سێدارەکەی لە دادگای باڵا وڵات و ڕەوانەکردنی دۆسیەکەی بۆ لقی یەکسان، بۆ سێیەم جار لە ٣ی شوباتی ٢٠٢٦ (١٤ی ڕێبەندانی ١٤٠٤ی ھەتاوی)دا لەلایەن دەزگای دادوەریی کۆماری ئیسلامیی ئێرانەوە بە تۆمەتی «سیخوڕی بۆ ئیسرائیل» سزای سێدارەی بەسەردا سەپایەوە. دواتر لە ٢ی ئایاری ٢٠٢٦ (١٢ی گوڵانی ١٤٠٥ی ھەتاوی)دا، سزای لەسێدارەدانی ناسر بەکرزادە لە ورمێ جێبەجێ کرا.

پەیوەندیی تەلەفۆنیی پێش لەسێدارەدان

ناسر بەکرزادە ماوەیەکی کەم پێش لەسێدارەدانی لە کۆتایییەکانی نیسانی ٢٠٢٦، لە بەندیخانەی ورمێ لە پەیوەندییەکی تەلەفۆنی لەگەڵ دەرەوەدا وتی:

« من ناسر بەکرزادەم و دەنگم لە زیندانی ناوەندیی ورمێ دەبیستن، ڕەنگە ئەمە کۆتا دەنگم بێت. کوڕی مەلا مەنسوورم، تەمەنم ٢٦ ساڵە و دوو خوشکم ھەیە لە خۆم بچووکترن. لە تەمەنی ٢٣ ساڵیدا، کاتێک لە لووتکەی ئاوات و حەزی ژیاندا بووم، دەستبەسەر کرام. دایک و باوکم لە یەکەم ڕۆژی دەستبەسەرکردنم تاوەکوو ئەمڕۆ، ھەموو ڕۆژێک دەمرن و زیندوو دەبنەوە. خەمی دووری و دابڕان، باری گران کردوون و لە لووتکەی گەنجیدا، پیر و کەنەفت بوون. جاران دڵخۆش بوون و ئاواتیان بوو تاقانە کوڕەکەیان لە جلی زاوایێتیدا ببینن، چەند ڕۆژێک بەر لە دەستبەسەرکردنم بڕیار بوو بچینە داخوازی، ئێستا چوار ساڵە ئەو کچە چاوەڕوانی منە. ئێستاش کە چەند کاتژمێرێکە ھەواڵی پەسەندکردنی سزای لەسێدارەدانەکەم بیستووە، نازانم چۆن پەیوەندیی پێوە بکەم و پێی بڵێم کە سزاکەم پەسەند کراوە و بڕیارە لەسێدارە بدرێم. دوای تەواوکردنی خوێندنی قوتابخانە، بەپێی بڕیاری باوکم و ئارەزووی خۆم، دەستم بە خوێندن کرد لە قوتابخانەی زانستە ئایینییەکانی سەڵاحەددین ئەیووبی لە پیرانشار. دوای دوو ساڵ خوێندن، بەھۆی دۆخی خێزانەکەمەوە، بڕیارم دا بەشێک لە بەرپرسیارێتیی سەرشانی باوکم کەم بکەمەوە و دووکانێکی فرۆشتنی مۆبایلم لە ورمێ کردەوە. داوا لە ھاونیشتمانییە خۆشەویستەکانم، لە کوردە بەغیرەتەکانی ناوخۆ و ھەموو شوێنێکی جیھان و لە مامۆستا ئایینییەکان کە من فەقێی ئەوان بووم دەکەم، ببنە دەنگی بێدەنگیم. دەنگم بگەیێننە ڕێکخراوەکانی مافەکانی مرۆڤ، لێبوردنی نێونەتەوەیی و ھەموو جیھان. ورمێ لە ھەموو ئێران جیاوازترە. ئەمە لە ناخی دڵمەوە دەڵێم: یەکەمین تاوانم کوردبوونم بوو، دوای ئەوەش سوننەبوونم، بە ھانامەوە بێن، من نە یەکەم کەسم و نە کۆتا کەس دەبم. »