مینیۆنەکان و دڕندەکان

پۆستەری فیلم

مینیۆنەکان و دڕندەکان فیلمێکی ئەنیمەیشنی کۆمیدیی ئەمریکیی ساڵی ٢٠٢٦ە کە لەلایەن پیێر کۆفینەوە دەرھێنراوە، کە لەگەڵ برایان لینچ بە ھاوبەشی فیلمنامەکەی نووسیوە. فیلمەکە لەلایەن ئیلومینەیشنەوە بەرھەم ھێنراوە، کە سێیەمین بەشە لە زنجیرە فیلمە پێشینەیییەکانی مینیۆنەکان، و حەوتەمین بەشی گشتییە لە زنجیرە فیلمەکانی کەسی نەفرەتلێکراودا. لە فیلمەکەدا کۆفین وەک ئەکتەری دەنگیی مینیۆنەکان بەشدارە، لەگەڵ ترێی پارکەر، ئالیسۆن جانی، کریستۆف ڤاڵتز، جێسی ئیزێنبێرگ، جێف بریجز، زۆی دۆیچ، بۆبی مۆینیھان، و فیل لۆمار. ڕووداوەکانی فیلمەکە پێش ڕووداوەکانی فیلمی مینیۆنەکان (٢٠١٥) ڕوودەدەن، و بەدوای کۆمەڵێک مینیۆندا دەچێت کاتێک دەیانەوێت فیلمێکی دڕندەی تایبەت بە خۆیان لە ھۆلیوودی کۆندا دروست بکەن.

دروستکردنی فیلمەکە لە تەممووزی ٢٠٢٤دا ڕاگەیەندرا، لە دوای بڵاوبوونەوەی فیلمی کەسی نەفرەتلێکراو ٤، کە تێیدا کۆفین و لینچ گەڕانەوە بۆ دەرھێنان و نووسین، و کریس مێلێداندری لەگەڵ بیڵ ڕایان کارەکانی بەرھەمھێنانیان گرتە ئەستۆ. جۆن پاول مۆسیقای فیلمەکەی داناوە، ئەمەش سێیەمین ھاوکاریی بوو لەگەڵ کۆمپانیای ئیلومینەیشن لە دوای فیلمەکانی لۆراکس (٢٠١٢) و کۆچکردن (٢٠٢٣)، و یەکەم بەشی زنجیرە فیلمی کەسی نەفرەتلێکراویش بوو کە مۆسیقاکەی لەلایەن ھێیتۆر پێرێراوە دانەنرابێت.

فیلمی مینیۆنەکان و دڕندەکان بۆ یەکەم جار لە فیستیڤاڵی نێونەتەوەییی فیلمی ئەنیمەیشنی ئانسی لە ٢١ی حوزەیرانی ٢٠٢٦ نمایشکرا، و لە ١ی تەممووزدا بە شێوەی سینەمایی لەلایەن یوونیڤەرساڵ پیکچەرز لە ویلایەتە یەکگرتووەکان بڵاوکرایەوە. فیلمەکە پێداچوونەوەی ئەرێنیی لەلایەن ڕەخنەگرانەوە پێدرا، و زۆرێک بە باشترین بەشی زنجیرەکە لە دوای فیلمی یەکەم دایان نا. داھاتی فیلمەکە گەیشتووەتە ٣٥٨ ملیۆن دۆلار لە سەرانسەری جیھاندا، بەمەش بووەتە دەیەمین پڕداھاتترین فیلمی ساڵی ٢٠٢٦.