میلانلو (گوند)

میلانلو ناوی گوندەوارێکە لە بەخشی ناوەڕاستی شارستانی ئێسفەرایێن سەر بە پارێزگای خۆراسانی باکوور لە ئێران. بەپێی سەرژمێریی گشتیی جەماوەر و خانووی ئێران لە ساڵی ٢٠٠٥، ژمارەی دانیشتووانی ٣٩٣٦ کەس (٨٩١ ماڵ) بووە.

ناوی گوند

ناوی گوندەکە لە ناوی ھۆزی 'میلان'ی کوردی کورمانجەوە ھاتووە کە لە سەردەمی سەفەوی لە باکووری کوردستانەوە ڕاگوێزراون بۆ خۆراسان. زۆرینەی ھۆزی میلان لە نێوان پارێزگای ئورفا (باکووری کوردستان) و پارێزگای ڕەققە (سووریا) دەژین؛ لە سەدەی نۆزدەھەم کۆنفدراسیۆنی ھۆزەکانی میلان بریتی بوو لە نزیکەی بیست ھۆزی گەورەی کورد و عەرەب بە سەرکردایەتی ئیبراھیم پاشای مللی. بەشێکی دیکەی ملان لە بناری ئاگری و دەوری ماکۆ و ناوچەکانی باکووری ورمێ لە پارێزگای ئازەربایجانی ڕۆژاوا دەژین.

کرمانج لە ئەسفەرایێن

کوردانی ئەسفەرایێن لە ناوەندی شارستانەکە بڵاون بە شێوەزاری کوردیی باکووری دەدوێن و نزیکەی ٣٩ تیرەن کە ناوەکانیان لە نووسراوی فەرمیی دەوڵەت پاشگری «لو»ی تورکی خراوەتە پاڵ، گرینگترینیان: جافکان، جانبەگان، ئەمەران (ئۆمەران)، پەرکان، پەھلەوان، تۆپکان، زەعفەرانلو، قاشکان (کاسکان)، میلان و ئیستاجلو. کۆی سەرژمێریان دەگاتە ٥٢٣٩١ کەس (١٠٨٨٧ خێزان).