محەممەد عابید سیراجەددینی

محەممەد عابید سیراجەددینی
نوێنەری خولی بیست و سێھەمی ئەنجومەنی ڕاوێژی نیشتمانی
ناوچەی بەربژێری	سنە
وردەکاریی تاکەکەسی
لەدایکبوون	١٩٢٧ بیارە، باشووری کوردستان
نەتەوە	کورد
پیشە	کەسایەتی ئایینییەکانی ڕێبازی نەقشبەندی، شاعیر و سیاسەتوان
ئایین	ئیسلام، سوننی

محەممەد عابید سیراجەددینی (١٩٢٧ لە بیارە - ) لە کەسایەتی ئایینییەکانی ڕێبازی نەقشبەندی، شاعیر و سیاسەتوانی کوردە. ئەو نوێنەری سنە لە خولی بیست و سێھەمی ئەنجومەنی ڕاوێژی نیشتمانیی ئێران بووە.

ژیان

محەممەد عابید سیراجەددینی لە ساڵی ١٩٢٧ لە بیارە لە باشووری کوردستان لەدایک بوو. بنەماڵەی لە کەسایەتییە ئایینییەکانی ڕێبازی نەقشبەندی بوون و محەممەد عوسمان سیراجەدینی دووەم مامی بوو. ئەو پەیوەندییەکی ھەرە نزیکی لەگەڵ مامی ھەبوو و لە زۆربەی دانیشتەکاندا وتاری دەگوت. سیراجەددینی لە بواری یاسای دادوەری و دەروونناسیی پەروەردەیی وانەی خوێند و بڕانامەی دکتۆرای وەرگرت. ئەو لە تەمەنی ٣٠ ساڵیدا زەواجی کرد و چوار منداڵی ھەبوو.

بە دوای سەرکوتکردنی کۆماری کوردستان لە ساڵی ١٩٤٦ حکوومەتی پاشایەتیی پەھلەوی بۆ کاریگەریدانان لە سەر بیری گشتیی کوردەکان ڕادیۆی کوردیی تارانی دامەزراند و محەممەد عابید سیراجەددینی بوو بە سەرپەرشتی ڕادیۆ. لەو سەردەمەدا بوو کە سیراجەددینی مۆلەتی کارکردن لە ڕادیۆی بە حەسەن زیرەک نەدا و ئەو بەناچار چوو بۆ بەغدا و لە ڕادیۆی کوردیی بەغدا گۆرانیی وت.

ھەروەھا دواتر لەنێوان ساڵانی ١٩٥٩-١٩٦٣ حکوومەتی پەھلەوی لە تاران ڕۆژنامەیەکی کوردی بە ناوی کوردستانی بڵاو کرد کە عەبدولحەمید بەدیعوززەمانی کوردستانی بەڕێوەبەر و بەرپرس و محەممەد عابیدی سیراجەددینی سەرنووسەری بوون.

محەممەد عابید سیراجەددینی ھەروەھا نوێنەری سنە لە خولی بیست و سێھەمی ئەنجومەنی ڕاوێژی نیشتمانیی ئێران (١ی ئەیلوولی ١٩٧١ ھەتا ٧ی ئەیلوولی ١٩٧٥) بوو.

شیعر

سیراجەددینی شیعریش نووسیوە و شیعرەکانی بە زمانەکانی سۆرانی، گۆرانی و فارسی لێ بەجێ ماوەتەوە. ئەو ھەروەھا ھەندێک لە شیعرەکانی سەعدی و حافزی لە فارسی وەرگێڕاندووەتە سەر زمانی کوردی. ھەندێک لە شیعرەکانی سیراجەددینی لەلایەن گۆرانیبێژانی کورد وەکوو مەزھەر خالقی، حەسەن زیرەک و ... خوێندرانەتەوە.