محیەدین نەقشبەندی پیرخزری چەمپاراوی

شێخ محییەدین نەقشبەندی پیرخزری چەمپاراوی، کوڕی شێخ مەلا عبدالقادر نەقشبەندی کوڕی سەیید محەممەد، کوڕی سەیید ئەحمەد، کوڕی سەیید مستەفا، لە نەوەی مامۆستا مەلا سەیید حەسنە، کە مەزاری لای مەزاری (پیرمەسور) لە گەڕەکی حاجی حانی شاری سلێمانییە، لە ساداتی پیرخزری شاھۆیە، لە نەوەی حەزرەتی ئیمام (ڕەزا)ی مەشھەدە.

لەدایکبوونی

ڕۆژی سێشەممە، ٥ی تەممووزی ١٩٣٢ – زایینی، کاتژمێر: ٨ی بەیانی، لە گوندی (چەمپاراوی) ناوچەی بانەی کوردستانی ئێران لەدایکبووە، شافیعی مەزھەب بووە و لە عەقیدەدا ئەشعەری بووە، مورشید و ڕابەری تەریقەتی نەقشبەندی بووە.

پرۆسەی ھاوسەرگیری

 لەگەڵ حاجی سەیید زادە (مینا) خانی کچی حاجی شێخ ڕەشیدی بۆسکانی، لە ساداتی بەرزنجە لە ڕۆژی دووشەممە ١٠ی ئابی ١٩٥٣- زایینی، پرۆسەی ھاوسەرگیری ئەنجامداوە. سێ منداڵی بەناوەکانی عەینەدین، فاتمە و بەھائەدین ھەبووە.

زانست و خوێندنی

سەرەتا لە ٦ی ئەیلوولی ١٩٣٩- زایینی، ڕۆژی چوارشەممە لە خزمەت باوکیدا لە مەدرەسەی خانەقای شێخانی چەمپاراو دەست دەکات بە خوێندن.

پاشان لە خزمەت مامۆستا مەلا (نەسروڵڵا)ی کەندەسورەی ناوچەی بانە کەوانەبێژی مەدرەسەی خانەقای شێخانی چەمپاراو بووە لە ساڵی ١٩٤٢- زایینی دەخوێنێت . پاشان لە خزمەت مامۆستا مەلا ئەحمەدی نەمەشیری بانە، کەوانەبێژی مەدرەسەی خانەقای شێخانی چەمپاراو بووە دەخوێنێت لە ساڵی ١٩٤٤- زایینی. پاشان لە خزمەت مامۆستا مەلا مەحموودی محەممەدی ئارمردەی، کەوانەبێژی مەدرەسەی شێخانی نەقشبەندی چەمپاراو بووە، لە ڕۆژی چوارشەممە ١٣ی ئازاری ١٩٤٦- زایینی دەست دەکات بە خوێندن. پاشان دەچێتە گوندی (بناویانی) ناوچەی پێنجوێن کە موڵکی شێخانی نەقشبەندی چەمپاراوە، لەوێ لە خزمەت مامۆستا (مەلا ساڵحی ھەنگەژاڵ)ی دەخوێنێت لە ساڵی ١٩٤٨- زایینی. پاشان دەگەڕێتەوە بۆ مەدرەسەی خانەقای شێخانی نەقشبەندی چەمپاراو لە خزمەت مامۆستا مەلا حمە ئەمین بەلوەی، کە وانەبێژی مەدرەسەی نەقشبەندی بووە لە خانەقای چەمپاراو درێژە بە خوێندن دەدات لە ساڵی ١٩٥٠- زایینی. پاشان لە خزمەت مامۆستا مەلا کامیلی تەوێڵەیی کە وانەبێژی مەدرەسەی شێخانی نەقشبەندی چەمپاراوی بووە لە ١ی تەممووزی ١٩٥٣- زایینی. پاشان دەچێتە شاری سلێمانی لە خزمەت مامۆستا عەبدولکەریمی مودەریس لە ساڵی ١٩٥٤- زایینی، دەست دەکات بە خوێندن، لە ڕۆژی سێشەممە ٢٥ی ئەیلوولی ١٩٥٦- زایینی بڕوانامەی زانستی لە خزمەتیا وەردەگرێت لە مزگەوتی (حاجی حان) لە سولەیمانی.

تەسەووف و تەریقەتی حەزرەتی شێخ محییەدین نەقشبەندی پیر خضری چەمپاراوی

لە دوای تەواوکردنی زانستە شەرعییەکان و وەرگرتنی مۆڵەتی زانستی، لە خزمەت باوکیدا مورشید و ڕابەری تەریقەتی نەقشبەندی حەزرەتی شێخ عزالدین نەقشبەندی، دەست دەکات بە سەیرو سلوکی عیرفانی، پلەوپایەکانی عیرفان و تەریقەتی نەقشبەندی تەواو دەکات، و لە خزمەتیا مۆڵەتی ئیرشاد وەردەگرێت؛ و لە ڕۆژی شەممە ٢٣ی ئازاری ١٩٧٤- زایینی دەبێتە جێگەدارو مورشیدی ناوداری ڕێبازی پیرۆزی نەقشبەندی.

دانراوەکان

خاوەنی ئەم دانراوانەیە، کە لە دوای خۆی بەجێ ماون بەڵام تا ئێستا بە چاپ نەگەیشتوون :-

1. موسوعە الأسئلە و الأجوبە فی مسائل شتی عدیدە.
2. أصحاب الکھف، ھۆنراوە بە کوردی.
3. چرای چاو، ھۆنراوە بە کوردی.
4. ستایشی حضرت، و کەراماتی ئەولیا.
5. ڕسالە البدعە، عەرەبی.
6. سؤال وجواب فی مسائل الفرائض، عەرەبی.
7. الوصیە السنییە للسالکین فی الطریقە النقشبندییە.
8. ھدایە العمرییە فی التجوید، فارسی.
9. ڕسالە فی الدعاء.
10. ڕسالە فی أنواع القلوب فی القرآن المحبوب، عەرەبی.
11. چرای مەجلیس، کوردی.
12. شەوچەرەی ڕەمەزان، ھۆنراوە بە کوردی. .
13. ئیخلآس نامە، ھۆنراوە بە کوردی. .
14. سەفەری موسی و خچر، ھۆنراوە بە کوردی..

١٥. دیوان حەزین، ١٨٠٠ ھۆنراوەیە.

1. چرای ڕێگە لە باسی تەریقەت، کوردی.
2. نور العرفان، عەرەبی.
3. وەرع، کوردی.
4. الأخلاص فی الطریقە النقشبندییە، عەرەبی.
5. الصدق فی الطریقە النقشبندییە، عەرەبی.
6. المحبە فی الطریقە النقشبندییە، عەرەبی.
7. من ھو المرشد فی الطریقە النقشبندییە، عەرەبی.
8. من ھو الصوفی، عەرەبی.
9. مختصر الرسالە فی إثبات الأستغاثە (فارسی).
10. صفحات الوردە منورە قلوب الزکییە، عەرەبی.
11. تذکر الآخرە، ھۆنراوە.
12. دیاری ڕەمەزان، ھۆنراوە بە کوردی.
13. سودو خێری سلآوات، ھۆنراوە بە کوردی.
14. چرای ئیسلام، ھۆنراوە بە کوردی.

وەفاتی و دەرھێنانی تەرمی پیرۆزی بە بێ ھیچ گۆڕانکارییەک

لە ڕۆژی چوارشەممە، ١٧ی حوزەیرانی ٢٠٠٩ – زایینی، ٢٣ی حوزەیرانی ١٤٣٠- کۆچی لە شاری سلێمانی کوردستانی عێراق، کاتژمێر: ٦ سەر لە بەیانی، لە گۆڕستانی گوندی (چنارە)ی چوارتای پارێزگای سولەیمانی بە خاک سپێردرا.

 لە ڕێکەوتی: ڕۆژی ھەینی ڕێکەوتی ١٥ی حوزەیرانی ٢٠١٢-زایینی، تەرمەکەی لە گۆڕستانی (چنارە) دەرھێنراوە، گواستراوە بۆ گوندی (شێخ مەلا عەبدولقادر) ناسراو بە (کۆخی شێخ)، کە موڵکی بنەماڵەی شێخ محییەدین نەقشبەندییە.

بەبێ ھیچ تێکچونێک، لاشەو بەدەن و موی وەک خۆی وابوو، تەنانەت کفنەکەی خراپ نەبوو بوو.