لکان

ھێماکەی ناوەڕاست بە مەجارییە، کە بە شێوەیەکی بەرفراوان بە یەکەوە لکاون. (ھێماکانی سەرەوە و خوارەوە کە بە ڕۆمانی و ئەڵمانی نووسراون، ھەردووکیان زمانی گەردانکراون.) بە کوردی واتە «وەزارەتی خۆراک و کشتوکاڵ: بەڕێوەبەرایەتیی گشتیی خۆراک و کشتوکاڵی شارستانی ساتو مێر».

لە زمانەوانیدا، لکان شێوازێکی دروستکردنی وشەکانە بە لکاندنی بەشەکانی وشە بەیەکەوە، کە تێیدا ھەر بەشێک مانایەکی ڕێزمانیی دیاریکراوی ھەیە. ئەو زمانانەی بەم شێوازەن پێیان دەڵێن زمانە لکاوەکان. بۆ نموونە، لە تورکیدا، وشەی evlerinizden («لە ماڵەکانتانەوە») لە بەشەکانی ev-ler-i-n-iz-den دروست بووە.

ئەمە جیایە لە زمانە دابڕاوەکان (وەک چینی) کە تێیدا وشەکان سادەن، بەشەکانیان یەک ناگرن و شێوەیان ناگۆڕێت (بۆ نموونە وشەکان بە پاشگر کۆ ناکرێنەوە، بەڵکوو تەنیا ژمارەیەک لە پێشیان دادەنرێت)، و جیایە لە زمانە گەردانکراوەکان (وەک زمانی عەرەبی) کە تێیدا یەک بەش بە جارێ ھەڵگری چەند مانایەکە و بە جۆرێک خۆی دەگۆڕێت بۆ گەیاندنی واتایەک (وەک گۆڕینی «كِتَاب» (کیتاب) بۆ «كُتُب» (کوتوب) بۆ کۆکردنەوە، لە جیاتی زیادکردنی پاشگرێکی جیا).