شۆخان عارف
شۆخان عارف | |
|---|---|
| لەدایکبوون | ١٩٨٤ |
| مەرگ | ٩ی تشرینی دووەمی ٢٠٢٠ (٣٦ ساڵ ژیاوە)[١][٢] |
| ھۆکاری مەرگ | کوژران بە فیشەک |
| نەتەوە | کورد |
| پیشە | پارێزەر و فەرمانبەر لە دادنووسی یەکی سلێمانی[٣][٤] |
| مناڵ(ەکان) | ٢ |
شۆخان عارف (١٩٨٤ – ٩ی تشرینی دووەمی ٢٠٢٠) فەرمانبەر و پارێزەرێکی کورد بوو. ڕۆژی دووشەممە، ٩ی تشرینی دووەمی ٢٠٢٠، تەرمەکەی لەنێو ئۆتۆمبێلەکەیدا لەسەر شەقامی بازنەیی مەلیک مەحموود لە شاری سلێمانی دۆزرایەوە.[١][٥] ڕووداوەکە وەک دۆسیەیەکی تەمومژاوی ماوەتەوە و تا ئێستاش بکەری سەرەکیی تاوانەکە دەستگیر نەکراوە.[٦][٣]
ژیاننامە
[دەستکاری]شۆخان عارف لە کاتی کوژرانیدا تەمەنی ٣٦ ساڵ بوو و وەک فەرمانبەر لە دادنووسی یەکی سلێمانی کاری دەکرد.[٣][٤] ھەندێک سەرچاوە ئاماژەیان بەوە کردووە کە پارێزەریش بووە.[٦][٧]
ناوبراو لە ساڵی ٢٠١٣ بە خواستی خۆی لە ھاوژینەکەی جیابووەتەوە و دوای جیابوونەوەکە لە ماڵی باوکی ژیاوە.[١][٢] بەپێی وتەی خانەوادەکەی، ھیچ کێشەیەکی لەگەڵ ھاوژینی پێشووی نەبووە.[٥] شۆخان دایکی دوو منداڵ بوو بە تەمەنەکانی ١١ و ١٢ ساڵ.[٤]
کوشتنەکەی
[دەستکاری]بەرەبەیانی ڕۆژی دووشەممە، ٩ی تشرینی دووەمی ٢٠٢٠، تەرمی شۆخان عارف لەنێو ئۆتۆمبێلەکەیدا لەسەر شەقامی بازنەیی مەلیک مەحموود لە سلێمانی دۆزرایەوە.[٦][٢] بەپێی لێدوانی وتەبێژی پۆلیسی سلێمانی، ئاسەواری سێ فیشەک بە جەستەیەوە دیار بووە.[٨][١]
لێکۆڵینەوەکان
[دەستکاری]دەزگا ئەمنییەکانی سلێمانی دەستیان بە لێکۆڵینەوە لە ڕووداوەکە کرد. وتەبێژی پۆلیس ئەوەشی خستەڕوو کە «بەپێی زانیارییە سەرەتاییەکان، کوشتنی ئەم کچە پەیوەندیی بە خێزانەکەیەوە نییە و بە تەواوی وردەکاریی کوشتنەکەمان دەستکەوتووە».[٨] لە ھەمان ڕۆژی دۆزینەوەی تەرمی شۆخاندا، گەنجێک لە دەریاچەی دوکان کۆتایی بە ژیانی خۆی ھێنا، ئەمەش وای کرد گومان دروست ببێت کە ڕووداوەکان پەیوەندییان پێکەوە ھەبێت.[١][٥] پۆلیس ڕایگەیاند کە بەڵگە و گرتەی ڤیدیۆیی پەیوەست بە ھەردوو ڕووداوەکەیان کۆکردووەتەوە و ڕەوانەی دادگایان کردووە.[٩]
بەڵام دواتر سەرچاوەیەک لە پۆلیس ڕایگەیاند کە کوشتنی شۆخان عارف ھیچ پەیوەندییەکی بە ڕووداوی خۆکوشتنی گەنجەکەی دوکانەوە نەبووە.[٦][٣]
لەسەرەتای لێکۆڵینەوەکاندا، چەند کەسێک وەک گومانلێکراو دەستگیر کران، بەڵام بەھۆی نەبوونی بەڵگەی پێویست ئازاد کران.[٦][٣] یەکێک لە ھۆکارەکانی قورسبوونی دۆزینەوەی تاوانباران، نەبوونی کامێرای چاودێری بوو لە شوێنی ڕووداوەکە.[٦]
کاردانەوەی خانەوادەکەی
[دەستکاری]ئێوارەی ھەمان ڕۆژی ڕووداوەکە، شیلان عارف، خوشکی شۆخان، لە کۆنگرەیەکی ڕۆژنامەوانیدا ڕایگەیاند کە خانەوادەکەیان ھیچ کێشەیەکیان لەگەڵ ھیچ کەس و لایەنێکدا نییە و سکاڵای یاساییان تۆمار کردووە تا پۆلیس و دادگا بکەران بدۆزنەوە.[١][٢][٥] شیلان ھەروەھا جەختی کردەوە کە «لەسەر دۆسیەکەش لە ھیچ کەس و لایەنێک خۆش نابین ئەگەر لە پشت ڕووداوەکەوە بن».[١][٢] ھەروەھا ئاماژەی بەوەش کرد کە ھیچ ئاشنایەتییەکیان لەگەڵ ئەو گەنجەدا نییە کە لە دوکان خۆی کوشتووە و دۆسیەکەیان بۆ دەزگا ئەمنییەکان جێھێشتووە.[٥]
لە بەشێکی تری قسەکانیدا، شیلان عارف ئاماژەی بەوە دا کە «ئەو کاتەی یەکێک لە براکانی بەڕێوەبەری چاکسازیی گەورانی سلێمانی بووە، چەند جارێک ھەڕەشەی لێ کراوە و تەقەیان لێ کردووە»، بەڵام ئەوەی نەبەستەوە بەوەی کە ڕاستەوخۆ پەیوەندی بە ڕووداوەکەوە ھەبێت.[٤]
سەرچاوەکان
[دەستکاری]- 1 2 3 4 5 6 7 «کەسوكاری ژنە كوژراوەكەی سلێمانی: كێشەمان لەگەڵ كەسدا نییە». ئاوێنە. ٩ی تشرینی دووەمی ٢٠٢٠. لە ١٥ی ئابی ٢٠٢٥ ھێنراوە.
- 1 2 3 4 5 «یەكەم لێدوانی خانەوادەی ژنە كوژراوەكەی ئەمڕۆی شاری سلێمانی». وێستگەنیوز. ٩ی تشرینی دووەمی ٢٠٢٠. لە ١٥ی ئابی ٢٠٢٥ ھێنراوە.
- 1 2 3 4 5 «کوشتنی "شۆخان"یش هێشتا بكوژهكهی دیار نییه.. دۆسیهی كوشتن له سلێمانی دیار نامێنێ». وشە. ١٢ی ئایاری ٢٠٢١. لە ١٥ی ئابی ٢٠٢٥ ھێنراوە.
- 1 2 3 4 «دۆسیەی ئەو ژنەی لەناو ئۆتۆمبێلەکەی دا کوژرا بەچی گەشت؟». نەوژین. ٢٦ی کانوونی یەکەمی ٢٠٢٠. لە ١٥ی ئابی ٢٠٢٥ ھێنراوە.
- 1 2 3 4 5 «خانەوادەی ئەو ژنەی لە سلێمانی کوژرا ڕوونکردنەوە لەسەر کەیسەکە دەدەن -». ڕۆژنیوز. ٩ی تشرینی دووەمی ٢٠٢٠. لە ١٥ی ئابی ٢٠٢٥ ھێنراوە.
- 1 2 3 4 5 6 «هێشتا بكوژی شۆخان له سلێمانی نهگیراوه.. له شهقامێكی گشتی تهرمهكهی دۆزرایهوه». وشە. ٢٨ی شوباتی ٢٠٢١. لە ١٥ی ئابی ٢٠٢٥ ھێنراوە.
- ↑ «توندوتیژییەکانی سەر ژنان دەردێک کە دەرمانی ناکەن -». ڕۆژنیوز. ٢٥ی تشرینی دووەمی ٢٠٢٠. لە ١٥ی ئابی ٢٠٢٥ ھێنراوە.
- 1 2 «تفەنگەکان بارانی ئەم پایزەیان بە خوێنی ژن سور کرد». نەوژین. ١٠ی تشرینی دووەمی ٢٠٢٠. لە ١٥ی ئابی ٢٠٢٥ ھێنراوە.
- ↑ «پۆلیس زانیاری نوێ سەبارەت بەكوشتنی ژنەكەی شاری سلێمانی دەخاتەڕوو». وێستگەنیوز. ١٤ی تشرینی دووەمی ٢٠٢٠. لە ١٥ی ئابی ٢٠٢٥ ھێنراوە.
