ستێپی یۆراسیا

کەمەربەندی ستێپی یوراسیا (فیرۆزەیی)

ستێپی یوراسیا، کە ھەروەھا پێی دەوترێت ستێپی گەورە یان ستێپەکان، ناوچە ژینگەیییە فراوانەکەی یوراسیایە لەناو لەوەڕگە مامناوەندەکان، ساڤاناکان و دەوەنستانەکانی بایۆمدا. بەناو مەنچوریا، مەنگۆلیا، شینجیانگ، کازاخستان، سیبیریا، ڕووسیای ئەورووپی، ئوکراینا، مۆڵدۆڤا، ڕۆمانیا، بولگاریا، ھەنگاریا و سلۆڤاکیادا درێژ دەبێتەوە.

لە سەردەمی پالێۆلیتیکەوە، ڕێڕەوی ستێپ ڕێڕەوی سەرەکیی وشکانی بووە لە نێوان ئەورووپای ڕۆژھەڵات، ئاسیای باکوور، ئاسیای ناوەڕاست و ئاسیای ڕۆژھەڵاتدا لە ڕووی ئابووری، سیاسی، و کولتوورییەوە. ڕێڕەوی ستێپ پێشینەی نەک تەنھا ڕێگای ئاوریشمە، کە لە سەردەمی دێرین و سەدەکانی ناوەڕاستدا گەشەی کرد، بەڵکو پێشینەی پردی وشکانیی یوراسیاشە لە سەردەمی مۆدێرندا. بە درێژاییی مێژوو نیشتمانی ئیمپراتۆرییەتە کۆچەرییەکان و زۆرێک لە کۆنفیدراسیۆنە ھۆزایەتییە گەورەکان و دەوڵەتە کۆنەکان بووە، وەک سیۆنگنو، سکایتیا، کیمێرییەکان، سەرماتیا، ئیمپراتۆرییەتیی ھۆنەکان، سۆغدیا، سیانبێی، ئیمپراتۆرییەتیی مەغۆل، ھۆزەکانی ماگیار، و خاقانشینی گۆکتورک.