| لەو ڕۆژەوە ڕۆیشتووە تۆراوە دڵی من
| | ھەرچەند ئەگەڕێم بێ سەروشوێن ماوە دڵی من |
| ئاخۆ بە چ شاخێکەوە گیرساوە دڵی من
| | یاخۆ بە چ داخێکەوە سوتاوە دڵی من |
| ئەو ھەم دەمی غەمخوارو نەدیمی منە یاڕەب
| | ئەو مەحڕەمی ئەسرارو قەدیمی منە یاڕەب |
| ئەو گەوھەری شەھوارو یەتیمی منە یاڕەب
| | کەوتۆتە چ بەحرێکەوە خنکاوە دڵی من |
| مەجنونی دوو گێسوی چ لەیلایەکە ئاخۆ
| | یا وامیقی جادووی چ عەزرایەکە ئاخۆ |
| دێوانەی ئاھوی چ سەحرایەکە ئاخۆ
| | کام چیھرە پەری دیوە کە ترساوە دڵی من |
| ئەتلێتەوە گاھێ بەخەیاڵی خەت و خاڵی
| | ئەخولێتەوە گاھێ بە چرای شەوقی جەماڵی |
| نازانی ئەگەر چۆنە بەدەست دەردەوە حاڵی
| | وەک پوش و پەڵاشێکە بەدەم باوە دڵی من |
| لەو چۆڵی بیابانە ئەبێ یاوەری کێ بێ
| | یا بەو کە ژو کێوانەوە سەودا سەری کێ بێ |
| یالەت لەت و ئەفگاری موژەی خەنجەری کێ بێ
| | چۆن ماوە لەسەد لاوە کە کوژراوە دڵی من |
| بۆچی نەڕژێ سەیلی سروشکم وەکو باران
| | بۆچی وەکو یەعقوب نەبمە شوھرەی شاران |
| لەو یۆسفە پرسیومە لە بێگانە و یاران
| | ھەر گیز نییە سۆراخی لەھیچ لاوە دڵی من |
| بۆخۆی بگریم یا نەفەسی پەردە دڕاوی
| | یا بۆ جگەری کون کون و سەد پارە کراوی |
| چی کردوە یاڕەب کە خەو و خواردن و ئاوی
| | دایم غەم و بێداری و خوێناوە دڵی من |
| چ بکەم ، چ بڵێم ، بۆ دڵەکەم کارییە دەردم
| | شاھیدی منن مویی سپی و چیھرەیی زەردم |
| خۆڕایی نییە ناڵەی گەرم و دەمی سەردم
| | ھەڵبەت بە بەڵایەکەوە ئاڵاوە دڵی من |
| ئەوسینە لە غەش خاڵییە،ئەو بێ ڕک و کینە
| | ئەو خادیمی شەرعی نەبەوی و میلەت و دینە |
| مەعلوم چووە بۆ خزمەتی سالاری مەدینە
| | وام زانی کە فەوتاوە ، نەفەوتاوە دڵی من |
| قوربانی کەسێ بم کە قوربانی ( نەبی) بێ
| | وەک بەندە سەگی دەرگەھی شاھی عەربی بێ |
| شاھی عەربی یەعنی قوڕەیشی نەسەبی بی
| | جەرگی بە دوو ئەبرۆی ئەوە جنراوە دڵی من |
| زاتێکی وەھای گرتووە ڕۆحم بە فیدای ئەو
| | شاھان شەو و ڕۆژ دێنەقەدەم بۆسی گەدای ئەو |
| بێخود مەبە ئیتر بە ئومێد و بەتەمای ئەو
| | نایەتەوە لات گەر سەری داناوە دڵی من |
