تۆڕی نێوخۆییی بێتەل

ئەم کۆمپیوتەرە نۆتبووکە لە ڕێگەی کارتی بێتەلی پی سی کاردەوە بە خاڵێکی دەستگەیشتنی بێتەلەوە بەستراوەتەوە.

نموونەیەک لە تۆڕێکی وای-فای

تۆڕی ناوخۆییی بێتەل (دەبلیو ئێڵ ئەی ئێن) تۆڕێکی کۆمپیوتەریی بێتەلە کە دوو ئامێر یان زیاتر بە بەکارھێنانی پەیوەندیی بێتەل بەیەکەوە دەبەستێتەوە بۆ پێکھێنانی تۆڕێکی ناوخۆیی (ئێڵ ئەی ئێن) لە چوارچێوەی ناوچەیەکی سنوورداردا وەک ماڵ، قوتابخانە، تاقیگەی کۆمپیوتەر، کەمپەس، یان بینای نووسینگە. ئەمە توانای جووڵانەوە لەناو ناوچەکەدا بە بەکارھێنەران دەبەخشێت و ھێشتا بە تۆڕەکەوە بەستراوە دەبن. لە ڕێگەی دەروازەیەکەوە، دەبلیو ئێڵ ئەی ئێن دەکرێت پەیوەندییەک بۆ ئینتەرنێتی فراوانتر دابین بکات.

تۆڕە ناوخۆیییە بێتەلەکان کە لەسەر بنەمای ستانداردەکانی ئای ترایپڵ ئی ٨٠٢٫١١ کار دەکەن، پڕبەکارھێنراوترین تۆڕی کۆمپیوتەرین لە جیھاندا. ئەمانە بە شێوەیەکی باو بە وای-فای دەناسرێن، کە نیشانەیەکی بازرگانیی سەر بە ھاوپەیمانیی وای-فایە. ئەوان بۆ تۆڕەکانی ماڵ و نووسینگەی بچووک بەکاردێن کە کۆمپیوتەرە لاپتۆپەکان، چاپکەرەکان، تەلەفۆنە زیرەکەکان، وێب تی ڤییەکان و ئامێرەکانی یاری لە ڕێگەی ڕاوتەری تۆڕی بێتەلەوە بەیەکەوە دەبەستنەوە، کە ئەویش لای خۆیەوە دەکرێت بیانبەستێتەوە بە ئینتەرنێتەوە. خاڵە گەرمەکان کە لەلایەن ڕاوتەرەکانەوە لە چێشتخانەکان، قاوەخانەکان، ھۆتێلەکان، کتێبخانەکان و فڕۆکەخانەکاندا دابین دەکرێن، ڕێگە بە بەکاربەران دەدەن لە ڕێگەی ئامێرە بێتەلە گەڕۆکەکانەوە دەستیان بە ئینتەرنێت بگات.