کوڵوکۆ

کوڵی دەروون یا کوڵوکۆی دەروون چەشنێک تاقیبوونەوەی وشیارییە کە تا ڕادەیەک کورتخایەنە و، لەگەڵ خۆیدا، چێژ و خۆشی، یا بەپێچەوانەوە، ئێش و ناخۆشی دێنێ و، تین بە جموجووڵ و چالاکیی زەین ئەدا. کوڵوکۆ بنچینەییەکان بریتین لە شادی، خەم، ترس، تووڕەیی، ڕق و، سەرسووڕماوی.

کوڵوکۆکان لە ٣ بەش پێک هاتووە:

• بەشی ناسیاری، بیر و باوڕ و چاوەڕوانی؛ کە جۆر و توندی وەڵامە هەستییەکان دەسنیشان دەکا. ئەو شتەی بۆ کەسێک زۆر خۆشە، لەوانەیە بۆ کەسێکی تر ناخۆش و ئازاردەر بێ..
• بەشی کارەندامناسی ، بریتییە لە گۆڕانکارییەکانی لەش. بۆ وێنە: کاتێک هەستی ترس یا تووڕەیی لە کەسێکدا بهورووژێ، لێدانەکانی دڵ زۆر دەبێ، گلێنەکان هەراو دەبن و هەناسەدان فرە دەکا. زۆربەی ورووژانەکان لەخۆگری ورووژانێکی گشتی کۆئەندامی دەمارە .
• بەشی دیمەنی، کە ئاماژە دەکا بە شێوە جۆراوجۆرەکانی دەربڕینی هەست، کە تێیدا شێوەی دەموچاو، شێوەی ئەندامەکان و جووڵەکانیان، ئاهەنگی دەنگ، چێژ، شادی، خەم، ترس و هەستەکانی تر دەگۆڕێن.