ئەپۆلۆ ١٣

ئەپۆلۆ ١٣ (١١–١٧ی نیسانی ١٩٧٠) حەوتەمین گەشتی سەرنشیندار بوو لە بەرنامەی بۆشاییی ئاسمانی ئەپۆلۆدا و بڕیار بوو سێیەمین نیشتنەوەی سەر مانگ بێت. کەشتییە ئاسمانییەکە لە ناوەندی کێنیدی بۆشایی ئاسمانەوە لە ١١ی نیسانی ١٩٧٠ ھەڵدرا، بەڵام نیشتنەوەکە ھەڵوەشێنرایەوە دوای ئەوەی تانکییەکی ئۆکسجین لە مۆدیۆلی خزمەتگوزاری (SM) دوای دوو ڕۆژ لە دەستپێکردنی گەشتەکە تەقییەوە، کە بووە ھۆی لەکارکەوتنی سیستەمی کارەبا و سیستەمی پاڵپشتی ژیان. تاقمەکە، بە پشتیوانیی سیستەمە یەدەگەکان لەسەر مۆدیۆلی مانگیی ئەپۆلۆ، لە بری ئەوە بە ڕێڕەوێکی دەوری مانگدا سووڕانەوە و لە ١٧ی نیساندا بە سەلامەتی گەڕانەوە سەر زەوی. گەشتەکە لەلایەن جیم لۆڤێڵ فەرماندەیی دەکرا، لەگەڵ جاک سویگەرت وەک فڕۆکەوانی مۆدیۆلی فەرماندەیی (CM) و فرێد ھایس وەک فڕۆکەوانی مۆدیۆلی مانگی (LM). سویگەرت لە دوا ساتدا جێگرەوەی کێن ماتینگلی بوو، کە لە گەشتەکە دوورخرایەوە دوای بەرکەوتنی لەگەڵ سوورێژەی ئەڵمانی.