ئەحمەد فەوزی

لە ئینسایکڵۆپیدیای ئازادی ویکیپیدیاوە

ئەحمەد کوڕی حاجی شێخ غەنی و نازناوی «فەوزی»یە، خەڵکی سلێمانییە، ژیانی بە مووچەخۆری بردووەتە سەر. لە شێخ مەحموودەوە نزیک بووە. لە ساڵی ١٩٣٩ لە سەنگاوەوە وەکو مووچەخۆرێک بۆ ناحیەی سوورچی گواستراوەتەوە.

لە پاش جەنگی جیھانیی یەکەم فەرمانڕەوایی لە ناوچەی سلێمانی بە شێخ مەحموود سپێردرا. زۆری نەخایاند پەیوەندی شێخ لەگەڵ ئینگلیز تێکچوو. لە شەڕی بازیانی لای بەردەقارەمان شێخ برینداربوو، بە دیلی گیرا، لە بەغدا دادگایی کرا، فەرمانی خنکاندنی بۆ دەرچوو، بەڵام لە سێدارە نەدرا و ڕەوانەی کوێت کرا، لەوێشەوە بۆ ھیندستان. لە دوای ئازادبوونی لە بەندیخانە بەھۆی گەڕانەوەی شێخ بۆ سلێمانی ئەحمەد فەوزی بەم شیعرە پێشوازی لێ کردووە:

شوکور لیللا موژدە بێ وا نووری ئیمان ھاتەوە ئەرشەدی ئەولادی حەیدەر شێری یەزدان ھاتەوە
ھەروەکو یووسف لە زیندانی ئەسارەت ھاتەوە شاھی میسرە سەد شوکر وا ڕوو بە کەنعان ھاتەوە
سەف بە سەف زومرەی مەلایک دێن بە ئستیقبالەوە بانگ ئەکەن وا مەزھەری ئیلتافی ڕەحمان ھاتەوە
عەرزی تەبریکات ئەکەن جن و مەلایک یەک بەیەک زەمزەمەی خەیرولقدوومە شاھی دەوران ھاتەوە
شەمشەمە کوێرە لە داخا خۆی لە قوڕ نێ حەقیەتی شەو نەما زوڵمەت بەسەرچوو مەھی ڕەخشان ھاتەوە
خاتەمی حوکمی لە دەس حیلەی شەیاتین دەرنەھات تا جەنابی ناسەفی موڵکی سلێمانی ھاتەوە
جامی مەی سابێنە گەردوش ساقیا تووبی خودا موددەتێکە دڵ حەزینم جانی جانان ھاتەوە
موتریبی خۆش لەھجە کوا دەنگی ڕەباب و عوود و نەی وەختی وەسڵە قاتیلی عومری ڕەقیبان ھاتەوە
جەژنی کوردستانە قوربان مەوقیعی قوربانییە چۆن بە قوربانی نەبم وا فەخری کوردان ھاتەوە
ئیددیعایی قەومییەت ئەمڕۆ ڕەوایە (فەوزی)! ڕافیعی ئەعلام و ئیستیقلالی کوردان ھاتەوە

سەرچاوەکان[دەستکاری]

  • مێژووی ئەدەبی کوردی، بەرگی پێنجەم، مارف خەزنەدار، لاپەڕە ٤٠ تا ٤٢، دەزگای چاپ و بڵاوکردنەوەی ئاراس، ھەولێر:٢٠٠٥.