ئێدمۆند لانداو

ئێدمۆند لانداو
ئێدمۆند لانداو
لەدایکبوون	Edmund Georg Hermann Landau; 14ی شوباتی 1877; بەرلین، شانشینی پرووسیا، ئیمپراتۆریەتیی ئەڵمانی
مردن	١٩ی شوباتی ١٩٣٨ (٦١ ساڵ ژیاوە); بەرلین، ئەڵمانیای نازی
بوارەکان	تیۆریی ژمارەکان; شیکاریی ئاوێتە
دامەزراوەکان	زانکۆی بەرلین; زانکۆی جۆرج ئاب گوتینگن; زانکۆی عیبریی ئۆرشەلیم
خوێندی باڵا	زانکۆی بەرلین
ڕاوێژکاری دکتۆرا	گیۆرگ فرۆبینیوس; لازاروس فۆکس
ناسراوە بەھۆی	تیۆرمی ژمارە سەرەتایییەکان
ھاوسەر	ماریان ئێرلیخ

ئێدمۆند گێئۆرگ ھێرمان لانداو (١٤ی شوبات ١٨٧٧ – ١٩ی شوبات ١٩٣٨) ماتماتیکزانێکی ئەڵمانی بوو کە لە بوارەکانی تیۆریی ژمارەکان و شیکاریی ئاوێتە کار و توێژینەوەی کردووە.

ژیاننامە

ئێدمۆند لانداو لە بنەماڵەیەکی جوولەکە لە بەرلین لەدایک بوو. باوکی، لیۆپۆلد لانداو، پسپۆڕی نەخۆشیی ژنان و دایکی، یۆھانا جاکۆبی بوو. لانداو ماتماتیکی لە زانکۆی بەرلین خوێند و لە ساڵی ١٨٩٩ پلەی دکتۆرای وەرگرت. دوای ئەوە، لە ساڵی ١٩٠١، بڕوانامەی دوای دۆکتۆرای بەدەست ھێنا، کە بڕوانامەیەکە بۆ وانەوتنەوە لە زانکۆکانی ئەڵمانیا پێویستە. نامەی دکتۆراکەی تەنھا ١٤ لاپەڕە بوو.

لانداو لە نێوان ساڵانی ١٨٩٩ تا ١٩٠٩ لە زانکۆی بەرلین وانەی وتووە. پاشان، کۆرسی مامۆستایەتی لە زانکۆی گۆتینگن وەرگرت. لە ساڵی ١٩٠٥ ھاوسەرگیری لەگەڵ ماریان ئێرلیخ، کچی زیندەناس و خاوەن خەڵاتی نۆبڵ پاول ئێرلیخ، کرد. لە کۆنگرەی نێودەوڵەتیی ماتماتیکزانان لە ساڵی ١٩١٢، لانداو چوار پرسیاری ناوداری تیۆری ژمارەکانی سەبارەت بە ژمارە سەرەتایییەکان خستە ڕوو و وتی بە شێوەیەکی تایبەتی بە ڕێگاکانی ماتماتیکیی ئەو سەردەمە زۆر دژوارن. ئەم چوار پرسیارە ھەتا ئێستا شی نەکراون و ئێستا بە ناوی پرسیارەکانی لانداو ناسراون.