ئاڵای گینێی ئیستوایی
 | ئەم وتارە بەزۆری یان بەتەواوی پشت بە تەنیا یەک سەرچاوە دەبەستێت. |
 | |
| بەکارھێنان | National flag and ensign   |
|---|---|
| ڕێژە | 2:3 |
| بەکارھاتوو | ١٢ی تشرینی یەکەمی ١٩٦٨[ئ] |
| دیزایین | سێ‌ڕەنگێکی ئاسۆییی سەوز، سپی، و سوور بە سێگۆشەیەکی شینی لاپێکەوتوو لە لای بەرزکەرەوەدا و نیشانی ھێزی گینێی ئیستوایی لە ناوەڕاستی کەمەرە سپییەکەدا |
ئاڵای نیشتمانیی گینێی ئیستوایی سێ‌ڕەنگێکی ئاسۆییی سەوز، سپی، و سوورە بە سێگۆشەیەکی شینی لاپێکەوتوو لە لای بەرزکەرەوەدا و نیشانی ھێزی گینێی ئیستوایی لە ناوەڕاستی کەمەرە سپییەکەدا. ئاڵاکە بەبێ نیشانی ھێز ھەڵکرا لە کاتی سەربەخۆییی وڵاتەکە لە ئیسپانیا لە ١٢ی تشرینی یەکەمی ١٩٦٨دا. لە کاتێکدا ھەم ئاڵاکە و ھەم نیشانی ھێز لە کاتی سەربەخۆییدا پەسەند کرابوون، نیشانی ھێزەکە دواتر زیادهێنرا بۆ ئاڵاکە. نیشانی ھێزەکە و بەو پێیەش ئاڵای نیشتمانی بە کورتی لە ساڵی ١٩٧٨ تا ٢١ی ئابی ١٩٧٩، لە کاتی سەرۆکایەتیی فرانسیسکۆ ماکیاس نگواینمادا گۆڕدران.
دیزاین و ھێماگەری
[دەستکاری]ئاڵاکە سێ‌ڕەنگێکی ئاسۆیییە بە کەمەرەکانی سەوز، سپی، و سوور، و سێگۆشەیەکی شینی لاپێکەوتوو لە لای بەرزکەرەوەدا. کەمەرە سپییەکە لە ناوەڕاستدا بە نیشانی ھێزی گینێی ئیستوایی نەخشێنراوە، کە قەڵغانێکی ڕەساسییە بە دارلۆکەیەک، دروشمی نیشتمانی بە ئیسپانی، و شەش ئەستێرەی شەش‌پڕ کە نوێنەرایەتیی پێنج دوورگەکەی وڵاتەکە و خاکی کیشوەرەکەی دەکەن. بەپێی ئەفسانەی ناوخۆیی، نوێنەرانی خۆماڵی و ئیسپانی یەکەم پەیماننامەیان لە خوار دارلۆکەیەک ئیمزا کرد، بەو ھۆیەوە لە ناوەڕاستی ئاڵاکەدا دانراوە.[١]
بەپێی وتەی ئاڵاناسی ئەمریکی ویتنی سمیت، سێگۆشە شینەکە نوێنەرایەتیی ئۆقیانووس دەکات کە بەشە جیاوازەکانی گینێی ئیستوایی بەیەکەوە دەبەستێتەوە، لە کاتێکدا سەوز ھێمای ڕووەکی وڵاتەکەیە، سپی ھێمای ئاشتییە، و سوور ھێمای ئەو خوێنەیە کە بۆ سەربەخۆیی ڕژاوە.[١]
مێژوو
[دەستکاری]کاتێک گینێی ئیستوایی سەربەخۆییی خۆی لە ئیسپانیا لە ١٢ی تشرینی یەکەمی ١٩٦٨دا بەدەستھێنا، نیشانی ھێزی ئێستای پەسەند کرد و ئاڵایەکی سێ‌ڕەنگی سەوز، سپی، و سووری بە سێگۆشەیەکی شین لە لای بەرزکەرەوەدا ھەڵکرد. نیشانی ھێزەکە دوای ماوەیەک زیادهێنرا بۆ ئاڵاکە. لە ساڵی ١٩٧٨دا، سەرۆک فرانسیسکۆ ماکیاس نگواینما نیشانی ھێزی نەتەوەکەی گۆڕی بۆ نیشانێک کە پێکھاتبوو لە شمشێرێک، خەنجەرێک، تەورێک، دارێک، کێڵووکێک، و کلۆکێک، کە بە مریشکێک تاجدارکرابوو و بە پەڕەی شەکاوەی دروشمی نیشتمانییەوە دەورە درابوو. ماکیاس نگواینما لەلایەن برازاکەی تێئۆدۆرۆ ئۆبیانگ نگوێما مباسۆگۆوە لە ٢١ی ئابی ١٩٧٩دا ڕوخێندرا، و ھێمایە نیشتمانییەکانی گینێی ئیستوایی گەڕێندرانەوە بۆ پێش سەردەمی دەسەڵاتی ماکیاس نگواینما.[١]
ئاڵای بەکارھاتوو لە گینێی ئیستواییدا لە کاتی کۆلۆنیکردنی ئیسپانییدا (١٧٨٥–١٩٣١)
ئاڵای گینێی ئیستوایی کە لە کاتی سەربەخۆییدا لە ١٢ی تشرینی یەکەمی ١٩٦٨دا ھەڵکرا
ئاڵای گینێی ئیستوایی لە ساڵی ١٩٧٨ تا ٢١ی ئابی ١٩٧٩
.svg)
.svg)
تێبینییەکان
[دەستکاری]- ↑ بە کورتی گۆڕدرا بۆ ئاڵایەک بە نیشانێکی ھێزی جیاوازەوە لە ساڵی ١٩٧٨ تا ٢١ی ئابی ١٩٧٩، لە کاتی سەرۆکایەتیی فرانسیسکۆ ماکیاس نگواینمادا.
سەرچاوەکان
[دەستکاری]- 1 2 3 Smith، Whitney (٩ی شوباتی ٢٠٠١). «Flag of Equatorial Guinea». ئەنپایکلۆپیدیا بریتانیکا (بە ئینگلیزی). Encyclopædia Britannica, Inc. لە ١٧ی تەممووزی ٢٠٢٦ ھێنراوە.
بەستەرە دەرەکییەکان
[دەستکاری]