کریستیانۆ ڕۆناڵدۆ

لە ویکیپیدیاوە، ئینسایکڵۆپیدیای ئازاد
باز بدە بۆ: ڕێدۆزی، گەڕان
کریستیانۆ ڕۆناڵدۆ دۆس سانتۆس ئەڤێڕۆ
لەدایکبوون ٥ی فێبریوەری ١٩٨٥
مادرید، پورتوگال
نەتەوە پورتوگالی
پیشە یاریزانی ڕیال مەدرید
باڵا ١،٨٦سم
کێش ٨٤ کگم
ئایین مەسیحی کاثۆلیک
یار ئێرینا شایک
منداڵەکان كريستيانؤ
ڕۆناڵدۆ دوور لە یاریگاکان

ناوی تەواو کریستیانۆ ڕۆناڵدۆ دۆس سانتۆس ئاڤیێرا ٥ی فێبریوەری ١٩٨٥ لە شاری مادرید لەووڵاتی پورتوگال لە خێزانێکی ھەژار کە باوکی باخەوان بووە و دایکیشی چێشتی بۆ ماڵان لێناوە لەدایک بووە، ئەو ئێستا یاری بۆ ھەڵبژاردەی تۆپی پێی پرتوگال و یانەی ڕیال مەدریدی ئیسپانی دەکات کە پێشتر یاری بۆ یانەکانی لشبۆنەی پرتووگالی [١] و مانچستەر یونایتدی ئینگلیسی کردووە [٢]، لە ساڵی ٢٠٠٣ ەوە یاری بۆ ھەڵبژاردەکەی دەکات[٣] و لە ئێستادا ئاڕمی کاپتنی ھەڵبژاردەکەی لە دەست گرتووە ، ئەو یەکێکە لە بەنرخترین یاریزانانی جیھان. ئەو کاتەی لەیانەی مانچستەر یونایتدی ئنگلیسی ڕووی کردە یانەی ڕیال مەدریدی ئیسپانی بەبڕی ٨٠ ملیۆن پاوندی (£) ئنگلیسی کە دەکاتە نزیکەی ٩٤ ملیۆن یۆڕۆ(€) یان ١٣٢ ملیۆن دۆلار($) [٤]، لەساڵی ٢٠٠٨ ئەو کاتەی لە یانەی مانچستەر یونایتدی ئینگلیزی یاری دەکرد بوو بە باشترین یاریزانی جیھان[٥].

ژیانی تاکەکەسی[دەستکاری]

ناونرا ڕۆناڵدۆ لەسەر ناوی سەرۆکی پێشووی ویلایەتە یەکگرتووەکانی ئەمریکا ڕۆنالد ڕیگان کە باوکی ڕۆناڵدۆ زۆر پێی سەرسام بوو.[٦] لە تەمەنی منداڵیدا ، جارێکیان سەری مامۆستاکەی بە کورسی شکاند[٧] چونکە مامۆستاکە گاڵتەی بە ڕەگەزی ڕۆناڵدۆ کردبوو کە خەڵکی شاری مادێریانە و ناوچەیەکی ھەژارنشینە. باوکی ڕۆناڵدۆ خۆزێ دینیس بەھۆی ئالودەبوون بە زۆر خواردنەوەی مەی تووشی نەخۆشی جگەر ھات و کۆچی دوایی کرد[٨] کاتێک ڕۆناڵدۆ تەمەنی ٢٠ ساڵ بوو.لە ساڵی ٢٠٠٧ ڕۆناڵدۆ پەڕتوکی ژیاننامەی خۆی بڵاوکردەوە بە ناوی ” ساتەکان ” [٩] . لەگەڵ یەکێک لە خوشکەکانی دوکانێکی بۆتیکیان کردەوە (پۆشاک) بە ناوی ” CR7 ” [١٠]کە ئێستا ئەو دوکانە دوو لقی ھەیە و ھەردووکیان لە پرتوگالە لە شارەکانی لیشبۆنە و مێدیرا،جوانترین خانمە ئەکتەر لای ڕۆناڵدۆ ئانجەلینا جولیە ھەمیشە ئارەزووی لەکارەکانی ئەو ھوونەرمەندەیە وە ڕۆناڵدۆ زۆر ئارەزوو لەکڕینی ئۆتۆمبێڵ دەکات تا ئێستا چەندەھا ئووتمبێلی تایبەت و گرانبەھای کڕیوە لەوانە فیڕاڕی و ئۆدی و ھیتر[١١] ، جگە لە پۆرتوگالی زمانەکانی ئیسپانی و ئینگلیزی بە باشی دەزانێت[١٢]

پەیوەندی خۆشەویستی[دەستکاری]

ڕۆناڵدۆ پێشتر پەیوەندی سۆزدار لەگەڵ ھەریەکە لە لوانا بیلێتی[١٣] ، ئیمۆجین تۆماس [١٤]، نێریدا گالاردۆ [١٥]، نیکی گازیان [١٦]، کارینا باچی [١٧]، مێرکۆ ڕۆمێرۆ ، میرێلا گریسلاس[١٨] [١٩]، پاریس ھیڵتۆن [٢٠]، کیم کارداشیان ڕافایلۆ فیکۆ و ئەلایس گۆدوین و جیما ئەتکینسن و ماریا شەراپۆڤا ھەبووە ، وە لە سەرەتاکانی ساڵی ٢٠١٠ تا ئێستا پەیوەندی لەگەڵ ئایرینا شایکی کچە نمایشکاری رووسی ھەیە .


لە ٢٠١٠/٧/٣ ڕۆناڵدۆ لەسەر تۆڕە کۆمەڵایەتییەکانی فەیسبووک و تویتەر ئاشکرایکرد کە بووەتە باوک[٢١] و کوڕەکەی ناونا کریستیانۆ . ڕۆناڵدۆ یەکەم کەسی نا ئەمریکی بو کە ژمارەی ھاندەرەکانی لە فەیسبووک لە ١٠ ملیۆن کەس تێپەڕێت . ژمارەی ھاندەرانی ڕۆناڵدۆ لە فەیسبووک لە ئێستادا زیاد لە ٥٠ میلیۆنە و بە بێ ڕکابەر لە پێش گشت یانە و یاریزانە وەرزشییەکان دێت .

ژیانی وەرزشی لەگەڵ یانەکان[دەستکاری]

ڕۆناڵدۆ لە تەمەنی ٨ ساڵیدا پەیوەندی کرد بە یانەی ئەندۆرینھا [٢٢]کە باوکی لەو یانەیە وەک باخەوان کاری دەکرد ، لە ساڵی ١٩٩٥ پەیوەندی کرد بە یانەی لۆکاڵی ناسیۆناڵ [٢٣]و نازناوی خولەکەی لەگەڵ ئەو یانەیە بەدەست ھێنا . ڕۆناڵدۆ چانسی تاقیکردنەوەی پیدرا لە یانەی سپۆرتینگ لیشبۆنە [٢٤]و بۆ ماوەی سێ ڕۆژ لە ژێر تاقیکردنەوەدابوو . دوای ئەو سێ ڕۆژە ڕاستەوخۆ لە ئەکادیمیای سپۆرتینگ وەرگیرا ، ڕۆناڵدۆ بووە یەکەم یاریزانی لە مێژووی ئەکادیمیاکە کە یاری بۆ سپۆرتینگی خوار ١٦ ساڵ و خوار ١٧ ساڵ و تیپی دووەمی سپۆرتینگ و تیمی یەکەمیش ئەنجام بدات .

کاتێک تەمەنی ١٥ ساڵ بوو ڕۆناڵدۆ تووشی نەخۆشی دڵەڕاوکێ ھاتبوو ، کە دوورنەبوو بەو ھۆیەوە بەیەکجاری لە یاریکردن دوورکەوتایەتەوە ، دوای ئەوە نەشتەرگەرییەکی بۆ ئەنجامدرا بە لێزەر . دوای ٣ ڕۆژ لە نەشتەرگەرییەکە ڕۆناڵدۆ گەڕایەوە مەشقەکان . لە یەکەم یاری خۆیدا لەگەڵ تیپی یەکەمی سپۆرتینگ دوو گۆڵی بۆ یانەکەی تۆمارکرد لەو یارییەی سپۆرتینگ ٣-٠ لە مۆریێرێنسی بردەوە.

لەگەڵ سپۆرتینگ لیشبۆنەی پرتووگالی[دەستکاری]

سەرەڕای بچووکی تەمەنی لە نیوان ساڵانی ٢٠٠١ بۆ ٢٠٠٣ ڕۆناڵدۆ ٢٥ یاری بۆ سپۆرتینگ ئەنجامدا [٢٥]. جیرارد ھۆولیەری ڕاھێنەری لیڤەرپوول یەکەم کەس بوو درکی بە تواناکانی کرد کاتێک تەمەنی ١٦ ساڵ بوو بەڵام بەرپرسانی یانەکە داواکەی ھۆولیەریان رەتکردەوە بە بیانووی ئەوەی تەمەنی بچووکە و زۆری ماوە گەشە بکات . لە ھاوینی ٢٠٠٣ سپۆرتینگ لیشبۆنە ٣-١ شکستی بە مانچێستەر یونایتد ھێنا و ڕۆناڵدۆ ئاستێکی بەرزی لەگەڵ سپۆرتینگ پێشکەش کرد . ئەوەش سەرنجی سێر ئەلێکس ڤیرگەسۆنی ڕاھێنەری ڕاکێشا و خودی یاریزانەکانی مانچستەریش داوایان لە یانەکەیان کرد پەلە بکەن لە کڕینی ڕۆناڵدۆ.


ڕۆناڵدۆ لەگەڵ مانچێستەر یونایتدی ئنگلیزی[دەستکاری]

ڕۆناڵدۆ بووە یەکەم یاری پرتوگالی لە مێژووی مانچێستەر یونایتد کاتێک بەرامبەر بە ١٥ ملیۆن یۆرۆ گوێزرایەوە بۆ ئینگلتەرا[٢٦] [٢٧]. ڕۆناڵدۆ سەرەتا داوای درێسی ژمارە ٢٨ی کرد ھەمان ئەو ژمارەیەی کە لە سپۆرتینگ دەیبۆشی ئەمەش بۆ ئەوەی فشاری زیاتر نەخاتە سەرخۆی لەگەڵ مانچێستەر چونکە ئەو ژمارەیە پێشتر ئەفسانە مێژووییەکانی وەک جۆرج بێست و برایان ڕۆبسۆن و ئێریک کانتۆنا و دەیڤد بێکھام پۆشیبوویان . ڕۆناڵدۆ لەوبارەیەوە دەڵێت ” کاتێک چوومە مانچێستەر، ڤیرگەسۆن لێی پرسیم چ ژمارەیەکت دەوێت و وتم ٢٨ ، بەڵام ئەو وتی نەخێر . تۆ ژمارە ٧ دەپۆشیت ، لەو کاتەوە ناچارکرام کە ھەموو ھەوڵێکم بخەمەگەڕ بۆ ئەوەی ئەو ژمارەیە بە بەرزی ڕابگرم و ئەو شانازییە نەشێوێنم کە پیم بەخشرابوو.

  • ڕۆناڵدۆ یەکەم یاری خۆی لەگەڵ مانچێستەر لە یاری بۆڵتۆن بوو کاتێک لە خولەکی ٦٠ بەشداریکرد و مانچستەر یارییەکەی ٤-٠ بردەوە .[٢٨] یەکەم گۆڵی خۆشی بەرامبەر بە پۆرتسمۆث تۆمارکرد لە ٢٠٠٣/١١/١ لە ڕێگای لێدانی ڕاستەوخۆ.[٢٩]
ڕۆناڵدۆ بە درێسی یانەی مانچێستەر یونایتدی ئنگلیزی
  • لە ٢٠٠٥/٨/٢٩ گۆڵی ژمارە ١٠٠٠ی یانەی مانچێستەری تۆمارکرد لەو یارییەی مانچیستەر ٤-١ دۆڕا بە میدڵزبرۆو . دوای تۆمارکردنی ١٠ گۆڵ لەلایەن خەڵاتی تایبەتی ” فیفپرۆ ” ی پێبەخشرا وەکو باشترین یاریزانی لاوی ساڵی ٢٠٠٥.[٣٠]
  • لە وەرزی ٢٠٠٦-٢٠٠٧ ڕۆناڵدۆ بۆ یەکەمجار زیاد لە ٢٠ گۆڵی تۆمارکرد و یەکەم نازناوی خولی ئینگلیزی لەگەڵ مانچێستەر بەرزکردەوە . لە ھەردوو مانگی ١١ و ١٢ی ٢٠٠٦ خەلاتی باشترین یاریزانی مانگی پریمەرلیگی پێبەخشرا.

دوابەدوای پروپاگندەکان کە باس لە گواستنەوەی دەکرا بۆ ڕیاڵ مەدرید بەرامبەر بە ٨٠ ملیۆن یۆرۆ لە ساڵی ٢٠٠٧ ، ڕۆناڵدۆ بۆ پێنج ساڵ گرێبەستەکەی لەگەڵ مانچستەر تازەکردەوە بەرامبەر بە موچەیەکی ١٢٠ ھەزار پاوەندی لە یەک ھەفتەدا . کە بە ھەر پێنج ساڵەکە دەیکرا ٣١ ملیۆن پاوەند . بەوەش بووە خاوەن زۆرترین موچە لە مێژووی یانەکەدا.

ڕۆناڵدۆ ھەر لەو ساڵەدا خەڵاتی باشترین یاریزانی فیدراسیۆنی یاریزانە پیشەگەرەکان و باشترین یاریزانی لاوی فیدراسیۆنی یاریزانە پیشەگەرەکانی پێبەخشرا کە بووە دووەم یاریزان لە یەک ساڵدا ھەردوو خەڵاتەکەی پێببەخشرێت لە دوای ئاندی گرەی کە لە ساڵی ١٩٧٧ بەدەستی ھێنابوو . دوای ئەو دوو خەڵاتە ڕۆناڵدۆ خەڵاتی ھاندەرانی فیدراسیۆنی یاریزانە پیشەگەرەکانیشی وەرگرت و بووە یەکەم یاریزان ھەر سێ خەڵاتەکەی فیدراسیۆنەکە وەربگرێت .

ڕۆناڵدۆ وەرزی ٢٠٠٧-٢٠٠٨ ی بە کارتێکی سوور دەست پێکرد کاتێک لیدانێکی سەری ئاڕاستەی ڕیچارد ھیوزی یاریزانی یانەی پۆرتسمۆز کرد و ڕۆناڵدۆ سێ یاری سڕکرا ، دوای ئەوە ڕۆناڵدۆ وتی لەو ڕووداوەوە فێرە ئەزموونێکی باش بووە و جارێکی دیکە ڕێگە نادات یاریزانی یانەی بەرامبەر ھەڵیبخەڵەتێنن و بە دەرکردنی بدەن .

ڕۆناڵدۆ پلەی دووەمی تۆپی ئاڵتونی بەدەست ھێنا لە ساڵی ٢٠٠٧ کاتێک ڕیکاردۆ کاکا تۆپەکەی بەرز کردەوە ، ھەروەھا پلەی سێھەمی باشترین یاریزانی فیفای پیبەخشرا لە دوای کاکا و میسی .

کریس یەکەم ھاتریکی خۆی لە مانگی یەکی ساڵی ٢٠٠٨ تۆمارکرد کاتێک مانچستەر ٦-٠ نیوکاسڵی بردەوە و پێشەنگی خولی ئینگلیزی گرتەدەست .

لە ٢٠٠٨/٣/١٩ بۆ یەکەمجار ڕۆناڵدۆ شارەی کاپتنی وەرگرت لە یاری بەرامبەر بۆڵتۆن کە مانچستەر ٢-٠ یارییەکەی بردەوە و ھەردوو گۆڵەکەش ڕۆناڵدۆ تۆماری کرد . بەو دوو گۆڵە ژمارەی گۆڵەکانی گەیاندە ٣٣ گۆڵ و بووە یەکەم یاریزان لە مێژووی یانەکە ئەو ژمارەیە تۆماربکات لە یەک وەرزەدا و ڕیکۆردی جۆرج بێستی شکاند کە ٣٢ گۆڵ بوو . بەوەش وازی نەھێنا و کۆی گۆڵەکانی گەیاندە ٣٥ گۆڵ لە ٣٧ یاری ناوخۆیی ئینگلتەرا و خەڵاتی قاچی زێڕینی ئەو ساڵەی پیبەخشرا.

لە ٥/٢١ یاری کۆتایی خولی پاڵەوانەکان ئەنجامدرا لە نێوان مانچستەر یونایتد و چێلسی ، ڕۆناڵدۆ گۆڵی پێشکەوتنی تۆمارکرد بەڵام چێلسی ئەنجامەکەی یەکسانکردەوە و یارییەکە ١-١ بەکۆتاھات . لە کاتی لێدانە سزا یەکلاکەرەوەکاندا ڕۆناڵدۆ گۆڵی تۆمارنەکرد و چێلسی یەک ھەنگاو دووربوو لەبەدەست ھێنانی نازناوەکە بەڵام جۆن تێریش تۆپەکەی فڕیدایە دەرەوەی یاریگا و مانچستەر نازناوەکەی بەرزکردەوە .

لە ھاوینی ٢٠٠٨ سکای سپۆرت ئاشکرایکرد ڕۆناڵدۆ دەیەوێت ڕووبکاتە ڕیاڵ مەدرید ئەگەر یانەکە ھەمان ئەو برە پارەیەی پێشکەش بکەن کە بەڵێنیان دابوو، پاشان مانچستەر یونایتد سکاڵای لەسەر ڕیاڵ تۆمارکرد بە تۆمەتی گفتوگۆی نھێنی لەگەڵ ڕۆناڵدۆ بەڵام فیفا ڕەتیکردەوە ھیچ کاردانەوەیەکی ھەبیت دژی ڕیاڵ .

لە ٧/٧ نەشتەرگەرییەکی لەسەر ئاستی پاژنەی پێ بۆ ئەنجامدرا و تاوەکو مانگ٩ لە یاریگاکان دابڕا . بەڵام لە یاری جامی خولی ئینگلیزیدا بەرامبەر بە میدڵزبرۆو دوو گۆڵی تۆمارکرد گەڕایەوە سەر سکەی گۆڵ تۆمارکرد . لە ٢٠٠٨/١١/١٥ ڕۆناڵدۆ لە یاری بەرامبەر بە ستۆک ستی گۆڵی ژمارە ١٠٠ و ١٠١ی خۆی بۆ شەیتانە سوورەکان تۆمارکرد لەو یارییەی مانچستەر ٥-٠ یارییەکەی بردەوە. کە بەوە توانی گۆڵ لە ھەر ١٩ یانەکەی خولی ئینگلیزی تۆماربکات .

لە ١٢/٢ ڕۆناڵدۆ بووە یەکەم یاریزانی مانچستەر خەڵاتی تۆپی ئاڵتونی پێببەخشرێت لەوەتەی ساڵی ١٩٦٨ کاتێک جۆرج بێست ئەو نازناوەی پێدرابوو . ڕۆناڵدۆ ٤٤٦ خاڵی کۆکردەوە بە جیاوازی ١٦٥ خاڵ لەگەڵ لیۆنێل مێسی خاوەن پلەی دووەم . پاشانیش خەڵاتی باشترین یاریزانی فیفای پێبەخشرا و بووە دووەم پرتوگالی لە دوای لویس فیگۆ وەک باشترین یاریزان ھەلبژێردرێت.

لە میانەی ئەو ساڵەدا و لە خولی پاڵەوانەکان ڕۆناڵدۆ لە دووری ٤٠ یاردە گۆڵی لە یانەی پۆرتۆ تۆمارکرد و ئەو گۆلەش وەکو جوانترین گۆڵی ساڵ دەستنیشانکرا.

ھەرچەندە لەو وەرزەدا ٤ یاری لە وەرزی ڕابردوو زیاتر ئەنجامدابوو بەڵام ڕێژەی گۆڵەکانی دابەزی و ٢٦ گۆڵی تۆمارکرد .

لە ٢٠٠٩/٦/١١ مانچێستەر یونایتد گرێبەستێکی ڕیاڵ مەدریدی پەسەند کرد بە بری ٨٠ ملیۆن پاوەند بۆ فرۆشتنی کریستیانۆ ڕۆناڵدۆ ، کە بەوە بووە گرانترین یاریزان لە مێژووی تۆپی پێ دا تاوەکو ئێستا.

ڕۆناڵدۆ لەگەڵ ڕیاڵ مەدریدی ئیسپانی[دەستکاری]

لە ٦/٢٦ ڕیاڵ مەدرید بە فەرمی ڕایگەیاند ڕۆناڵدۆیان کڕیووە بەبڕی ٨٠ ملیۆن پاوەند [٣١]و لە لە ٧/١ پێشکەش بە ھاندەرانیان کرد . لەو بەروارەدا و لە ڕۆژێکی مێژوویدا ٨٠ ھەزار ھاندەر لە ناو یاریگای سانتیاگۆ بێرنابیۆ ئامادەبوون بۆ پێشوازی لە کریستیانۆ ڕۆناڵدۆ .[٣٢] گرێبەستەکەی ڕۆناڵدۆ لەگەڵ ڕیاڵ بۆ ماوەی ٦ ساڵە و سزای ھەڵوەشاندنەوەشی ١ ملیار یۆرۆیە . لە ٧/٦ درێسی ژمارەی ٩ی لەلایەن ئەلفرید دی ستیفانۆوە پێبەخشرا و بۆ ماوەیەکی کاتی بووە CR9 بەھۆی ڕاول گۆنزالیسی ئەفسانەی یانەکەوە کە درێسی ژمارە ٧ی دەپۆشی ، بەڵام لە دوای ڕۆیشتنی ڕاول جارێکی دیکە CR7 گەڕایەوە .

ڕۆناڵدۆ بە درێسی یانەی شاهانە

لە ٨/٢٩ ڕۆناڵدۆ یەکەم یاری لە لایگا ئەنجامدا و گۆڵی تۆمارکرد . لە یەکەم یاری خۆیشیدا لە خولی پاڵەوانەکان لەگەڵ ڕیاڵ دوو گۆڵی تۆمارکرد لەو یارییەی مەدرید ٥-٢ لە زیورخی بردەوە. دوای تۆمارکردنی گۆڵێک لە ڤیاڕیاڵ بووە یەکەم یاریزان کە لە یەکەم چوار یاری خۆیدا لەگەڵ یانەکە گۆڵ لە ھەرچواریدا گۆڵ تۆماربکات . لە یاری نێودەوڵەتی پرتوگال و ھەنگاریا لە ١٠/١٠ ڕۆناڵدۆ پێکرا و تاوەکو ١١/٢٥ نەگەڕایەوە . ڕۆناڵدۆ بۆ یاری کلاسیکۆی بەرامبەر بەرشلۆنە گەڕایەوە و ڕیاڵ ئەو یاریەی دۆڕاند . لە یاری بەرامبەر بە ئەلمێریا کە ٤-٢ بردیانەوە یەکەم کارتی سووری لەگەڵ ڕیاڵ وەرگرت و لێدانێکی سزاشی لەدەستدا. لە ٢٠١٠/٥/٥ ڕۆناڵدۆ یەکەم ھاتریکی خۆی لەگەڵ ڕیاڵ تۆمارکرد . لە کۆتایی وەرزدا ڕۆناڵدۆ و ھیگواین پیکەوە ٥٣ گۆڵیان بۆ مێرەنگی تۆمارکرد کە ئەوەش بەرزترین ڕێژەی گۆڵ تۆمارکردنی دوو یاریزانە لە مێژوودا. لە وەرزی ٢٠١٠ – ٢٠١١ ڕاول ڕیاڵی جێھێشت و جارێکی تر درێسی ژمارە ٧ی پۆشی . لە ٢٣ی ئۆکتۆبەر لە یاری بەرامبەر ڕاسینگ چوار گۆڵی تۆمارکرد و بۆ یەکەمجار ڕۆناڵدۆ سوپەر ھاتریکی تۆمارکرد و لەو مانگەدا بە تەنیا ١١ گۆڵی تۆمارکرد. لە سەرەتای ساڵی ٢٠١١ ـەوە ڕێژەی گۆڵەکانی ڕۆناڵدۆ بە شێوەیەکی خەیاڵی ڕوو لە زیادی کرد ، بە چەشنێک ھەرزوو بە گۆڵکارە مێژووییەکانی ڕیاڵ مەدرید بەروارد کرا وەکو ڕاول و دی ستیفانۆ و ھوگۆ سانچێز . ئەو ئاستە بێ وێنەی ڕۆناڵدۆ لە یاری بەرامبەر بە خیتافی دەستی پێکرد ، کاتێک دوو گۆڵی تۆمارکرد لەو یارییەی ٣-٢ بردیانەوە . دوای ئەو یارییە ھاتریکێکی دیکەی تۆمارکردو گۆڵێکی بۆ ڕیکاردۆ کاکا دروست کرد کە یەکەم گۆڵی کاکا بوو لە دوای چاک بوونەوەی لە پێکانەکەی ، بە تێپەڕبوونی کات زیاتر نزیک دەبووەوە لە ژمارە پێوانەییەکەی ھوگۆ سانچێز و تیلمۆ زارا کە ٣٨ گۆڵیان لە خولی ئیسپانی تۆمارکردبوو، دواجار بەتۆمارکردنی ٤١ گۆل ئەو ڕیکۆردەشی شکاند سەرەڕای دوو جار دوورکەوتنەوەی لە پێکان و تۆمارکردنی تەنیا ٢ گۆڵ لە مانگێکدا ، ڕۆناڵدۆ لە مانگی چوار بە گڕوتینێکی زۆرەوە گەڕایەوە و بە گۆڵبارانکردنی یانەکان کۆی گۆڵەکانی گەیاندە ٤٢گۆڵ پاشان لە تێکشکاندنی سیڤیلیا جارێکی تر سوپەرھاتریکی تۆمارکرد و کۆی گۆڵەکانی لە گشت بۆنەکان گەیاندە ٤٦ گۆڵ و ژمارە پێوانەییەکەی ڕابردووی لەگەڵ مانچێستەر تێپەڕاند کە ٤٢ گۆڵ بوو . لە ٥/١٥ لە یاری بەرامبەر بە ڤیاڕیاڵ کە ریاڵ مەدرید ٣-١ بردییەوە

لە دواین یاری وەرزی ٢٠١٠-٢٠١١ شدا بەرامبەر بە ئەلمیریا دوو گۆڵی دیکەی تۆمارکرد و بووە یەکەم یاریزان لە مێژووی لالیگا ٤٠ گۆڵ تۆماربکات کە زۆرێک دەڵێن ٤١ بەھۆی ئەو گۆڵەی لە یاری بەرامبەر بە ڕاسینگ سانتاندێر تۆمارکرا و بە ناوی پیپی بەرگریکار نوسرا .

جارێکی دیکە خەڵاتی پێلاوی ئاڵتونی پێدرا کە دەدرێت بەو یاریزانەی زۆرترین گۆڵ لە یارییە ئەوروپییەکان تۆماردەکات و بووە یەکەم یاریزانیش کە ئەو نازناوە لە دوو خولی جیاوازدا بەدەست بھێنێت. ڕۆناڵدۆ لەو وەرزەدا ٥٣ گۆڵی لە یارییە فەرمییەکاندا تۆمارکرد.

لە خۆئامادەکارییەکان بۆ وەرزی ٢٠١١-٢٠١٢ لە یاریبەرامبەر بە چیڤاز گوادالاخارا لە نیوەی دووەم بەشداری کرد و ھاتریکی تۆمارکرد . ستایشێکی زۆری یاریزانەکە کرا لە میانەی یارییە خۆ ئامادەکارییاکان و ھەموو بە پەرۆشەوە چاوەڕوانی دەستپیکردنی وەرزی و گۆڵەکانی ڕۆناڵدۆ بوون . ڕۆناڵدۆ لە ٢٠١١/٨/١٧ لە یاری گەڕانەوەی جامی سوپەری ئیسپانیا بەرامبەر بە بەرشلۆنە کۆی گۆڵەکانی لەگەڵ ڕیاڵ مەدرید گەیاندە ١٠٠ گۆڵ لە تەنھا ٢ ساڵدا .

لە یەکەم یاری وەرزی تازەشدا بەرامبەر ڕیاڵ زاراگۆزا ھاتریکی تۆمارکرد و زلھێزی خۆی لەم وەرزەشدا دووپاتکردەوە.

کاسترۆڵ کە ڕیزبەندییەکی فەرمییە بۆ وەرزشکاران ڕاپۆرتێکی ڤیدیۆیی بڵاوکردەوە بە ناوی ” ڕۆناڵدۆ : تاقیکراوەتەوە بۆ سنووردارکردن ” تێیدا گشت لایەنەکانی شێوازی یاریکردنی ڕۆناڵدۆ و گشت ئەو پێگانەی کە یاری تێدا کردووە خرایە ڕوو . پاشان ئەو تاقیکردنەوەیە وەکو باشترین یاریزان کە زۆرترین تایبەتمەندی ھەیە و دەتوانێت لە زۆرترین شوێن و بارودۆخدا یاری بکات دەستنیشانکرا.

ناوبراو تاوەکو کۆتایی ھەفتەی دەیەم بە تۆمارکردنی ١٠ گۆڵ لە پێشەنگی گۆڵکارانی لالیگا دێت.

ژیانی وەرزشی لەگەڵ ھەڵبژاردەی پرتووگال[دەستکاری]

ناوبراو بۆ یەکەمجار لە ٢٠٠٣/٨/٢٠ بانگھێشتی ڕیزەکانی ھەڵبژاردەی پرتوگال کرا لە یاری بردنەوە بەرامبەر کازاخستان .

ڕۆناڵدۆ لەیاریەکی هەڵبژاردەی پرتووگال

ڕۆناڵدۆ لە یۆرۆی ٢٠٠٤[دەستکاری]

ڕۆناڵدۆ بانگھێشتی جامی نەتەوەکانی ئەوروپای ٢٠٠٤ کرا ، یەکەم گۆڵی خۆی بەرامبەر بە یۆنان تۆمارکرد لەو یارییەی ٢-١ دۆڕان ، وە ھەروەھا لە بردنەوەش بەسەر ھۆڵەندا ٢-١ لە قۆناغی چارەگی کۆتایی گۆڵی دووەمی تۆمارکرد . سەرەڕای تۆمارکردنی تەنیا دوو گۆڵ لە پێکھاتەی نمونەیی پاڵەوانێتییەکەدا ھەڵبژێردرا .

ڕۆناڵدۆ لە جامی جیھانی ٢٠٠٦[دەستکاری]

لە پاڵاوتنەکانی جامی جیھانی ٢٠٠٦ دا ڕۆناڵدۆ گۆڵکاری دووەمی پاڵاوتنەکانی کیشووەری ئەوروپا بوو بە تۆمارکردنی ٧ گۆڵ . وە یەکەم گۆڵی خۆی لە جامی جیھانیدا بەرامبەر بە ئێران تۆمارکرد لە ڕێگای لێدانی سزا .

لە میانەی یاری ٢٠٠٦/٧/١ لە نێوان پرتوگال و ئینگلتەرا واین ڕوونی ھاوڕێی گیانی بە گیانی ڕۆناڵدۆ کە ئەوکات پێکەوە لە مانچێستەر یونایتد یاری دەکرد بە کارتی سوور لە یارییەکە دەکرا دوای فاوڵێک لەسەر ڕیکاردۆ کارڤالیۆ . پاش ئەو ڕووداوە ڕۆژنامەکانی ئینگلتەرا ڕۆناڵدۆیان بە ھۆکاری دەرکردنی ڕوونیزانی چونکە دوای فاوڵەکە ڕۆناڵدۆ راستەوخۆ روویکردە ناوبژیوان و لە پاش ئاخاوتنەکەی ئەو ناوبژیوان ڕوونی دەرکرد . دوای یارییەکە ڕۆناڵدۆ دووپاتی کردەوە ئەو و روونی ھەر ھاوڕێن بەڵام ڕوونی ڕۆناڵدۆی بە دوژمن ناوبرد و بۆ ماوەیەک پەیوەندی نێوانیان بارگرژی تێکەوت . بەھۆی فشاری بەردەوامی ڕۆژنامەکان لەسەر ڕۆناڵدۆ و تۆمەتبارکردنی یاریزانەکە بڕیاری جێھێشتنی مانچستەریدا و لە لێدوانێکدا بۆ مارکا ڕایگەیاند دەیەوێت رووبکاتە ڕیاڵ مەدرید . بەڵام پاشان سێر ئەلیکس ڤێرگەسۆن ، کارلۆس کیرۆشی ڕاھینەری یاریدەدەری خۆی کە ھاوڵاتی ڕۆناڵدۆیە ناردە لای یاریزانەکە و بارودۆخەکە ھێورکرایەوە و ڕۆناڵدۆ و ڕوونیش ئاشت بوونەوە.

لە دوای جامی جیھانی یەک ڕۆژ لە دوای ئەوەی بوو بە ٢٢ ساڵ لە بەرواری ٢٠٠٧/٢/٢ بۆ یەکەمجار بووە کاپتنی پرتوگال لە یاری دۆستانەی بەرامبەر بە بەڕازیل ھۆکاری بوون بە کاپتنی ڕۆناڵدۆ ئەوە بوو سەرۆکی پێشووی تۆپی پێی پرتوگال کارلۆس سیلڤا کە پێش ٢ ڕۆژ بەر لە یارییەکە مرد وەسێتی کردبوو ڕۆناڵدۆ لەو یارییەدا کاپتن بێت سەرەڕای بچوکی تەمەنی .

ڕۆناڵدۆ و مێسی لەکاتی وەرگرتنی دیاریەک

یۆرۆی ٢٠٠٨[دەستکاری]

لە میاننەی پاڵاوتنەکانی جامی نەتەوەکانی ئەوروپای ٢٠٠٨ ڕۆناڵدۆ ٨ گۆڵی تۆمارکرد و گۆڵکاری دووەمی پاڵەوانێتییەکە بوو . بەڵام لە میانەی یۆرۆی ٢٠٠٨ تەنیا یەک گۆڵی تۆمارکرد[٣٣] و لە قۆناغی چارەگی کۆتایی بەرامبەر بە ئەلمانیا تووشی شکست ھاتن .. دوای ئەوەی لە مانگی حەوتی ٢٠٠٨ کارلۆس کیرۆش بووە ڕاھینەری پرتوگال ڕۆناڵدۆی وەک کاپتنی یەکەمی تیمەکەی دەستنیشانکرد.

جامی جیھانی ٢٠١٠[دەستکاری]

لە ٢٠١٠/٦/١٥ لە یاری یەکەمی پرتوگال بەرامبەر بە کۆتدیڤوار ڕۆناڵدۆ بە توندی لێیدرا لەلایەن گای دیمێلی ئیڤواری ، پاش ئەوەی ھەردوو یاریزانەکە بووە دەمەقاڵێیان ھەردووکیان بە کارت لەلایەن ناوبژیوانەوە وەڵامیان درایەوە . ھەرچەندە تۆپی پێی پرتوگال داوای سڕینەوەی کارتەکەی ڕۆناڵدۆی کرد بەو پێیەی فاوڵی لێ گیراوە بەڵام داواکەیان رەتکرایەوە.

کریس ئاستێکی باشی لە جامی جیھانی پێشکێش نەکرد . تاکە گۆڵی لە پاڵەوانێتییەکە لە یاری بردنەوە بوو بەسەر کۆریای باکور بە ئەنجامی ٧-٠ . کە یەکەم گۆڵی بوو بۆ پۆرتوگال لە دوای ١٦ مانگ. لە قۆناغی ١٦ پرتوگال لەلایەن ئیسپانیای پاڵەوانی جامەکە کرایە دەرەوە.


یۆرۆی ٢٠١٢[دەستکاری]

لە یۆڕۆی ٢٠١٢ەش ڕۆناڵدۆ و ھەڵبژاردەی پۆرتوگال گەیشتنە یاری پێش کۆتایی و لەوێدا بە ھەڵبژاردەی نیشتمانی ئیسپانیا بە لێدانی یەکلاکەرەوەی سزا دووچاری شکست ھاتن و لەپاڵەوانییەتییەکە ھاتنە دەرەوە [٣٤]و ڕۆناڵدۆ لەم پاڵەوانییەتیە سێ گۆڵی کرد و بەھاوبەشی لەگەڵ پێنج یاریکەری دی بوونە گۆڵکار[٣٥].


دەستکەوت و سەرژمێریەکان[٣٦][دەستکاری]

گۆڵەکان[٣٧][دەستکاری]

- لەگەڵ سپۆرتینگ لیشبۆنە : ٢٥ یاری ئەنجامداوە – ٣ گۆڵی تۆمارکردووە

- لەگەڵ مانچستەر یونایتد : ١٩٦ یاری ئەنجامداوە – ١١٨ گۆڵی تۆمارکردووە

- لەگەڵ ڕیاڵ مەدرید –١٣٥ یاری ئەنجامداوە – ٨٤ گۆڵی تۆمارکردووە. (بەردەوامە)

کۆی گشتی یارییەکان : ٤٢٦ – کۆی گشت گۆڵەکان : ٢٢١. (بەردەوامە)

لەگەڵ ھەڵبژاردەی یەکەمی پرتوگال : ٣٩ گۆڵ لە ١٠٤ یاری (بەردەوامە)

  • بەپێی یارییە فەرمییەکانە

نازناو و شانازییەکان[٣٨][دەستکاری]

  • لەگەڵ مانچستەر یونایتدی ئنگلیزی [٣٩][٤٠]:
  1. نازناوی خولی ئینگلیزی ( ٣ جار ) : ٢٠٠٦،٢٠٠٧،٢٠٠٨
  2. جامی ئینگلتەرا ( ١ جار ) :٢٠٠٣
  3. جامی خولی ئینگلیزی ( ٢ جار ) : ٢٠٠٥ ، ٢٠٠٨
  4. جامی قەڵغانی یەکێتی ئینگلتەرا ( ١ جار ) : ٢٠٠٧
  5. خولی پاڵەوانەکانی ئەوروپا ( ١ جار ) : ٢٠٠٨
  6. جامی جیھانی یانەکان ( ١ جار ) : ٢٠٠٨.

لەگەڵ ڕیاڵ مەدرید[٤١][دەستکاری]

  1. کۆپا دێل ڕەی ( 2 جار ) : 2010 ---- 2014
  2. خوولی ئیسپانیا ناسراو بە لالیگا ٢٠١١ - ٢٠١٢
  3. جامی سوپەری ئیسپانیا ٢٠١٢
  4. خولی یانە پاڵەوانەکانی ئەوڕووپای ٢٠١٣-٢٠١٤

نازناوە تاکە کەسییەکان[دەستکاری]

  1. پێکھاتەی نمونەیی جامی نەتەوەکانی ئەوروپا: ٢٠٠٤
  2. خەڵاتی براڤۆ: ٢٠٠٤
  3. خەڵاتی تایبەتی باشترین یاریزانی گەنجی فیفپرۆ (٢ جار):٢٠٠٤، ٢٠٠٥
  4. باشترین یاریزانی پرتوگالی: ٢٠٠٦
  5. پێکھاتەی نمونەیی خولی پاڵەوانەکان (٥ جار): ٢٠٠٣، ٢٠٠٦، ٢٠٠٧، ٢٠٠٨، ٢٠٠٩
  6. یاریزانی سێر مات بەسبی ساڵ (٣ جار): ٢٠٠٣، ٢٠٠٦، ٢٠٠٧
  7. پێکھاتەی نمونەیی جیھانی فیفپرۆ (٤ جار): ٢٠٠٦، ٢٠٠٧، ٢٠٠٨، ٢٠٠٩.
  8. خەڵاتی فیدراسیۆنی یاریزانە پیشەگەرانی ئینگلتەرا بۆ باشترین یاریزانی لاوی ساڵ: ٢٠٠٦
  9. خەڵاتی فیدراسیۆنی یاریزانە پیشەگەرانی ئینگلتەرا بۆ باشترین یاریزانی ساڵ (٢ جار): ٢٠٠٦، ٢٠٠٧
  10. خەڵاتی فیدراسیۆنی یاریزانە پیشەگەرانی ئینگلتەرا بەگوێرەی دەنگ ھاندەران (٢ جار): ٢٠٠٦، ٢٠٠٧
  11. خەڵاتی فیدراسیۆنی یاریزانە پیشەگەرانی ئینگلتەرا بۆ پێکھاتەی نمونەیی: ٢٠٠٥، ٢٠٠٦، ٢٠٠٧، ٢٠٠٨.
  12. باشترین یاریزانی خولی ئینگلیزی (٢ جار ): ٢٠٠٦ – ٢٠٠٧
  13. باشترین یاریزانی مانگ لە خولی ئینگلیزی: یانزەی ٢٠٠٦، دوانزەی ٢٠٠٦، یەکی ٢٠٠٨، سێی ٢٠٠٨.
  14. پێڵاوی ئاڵتونی پریمەرلیگ: ٢٠٠٧
  15. گۆڵکاری خولی پاڵەوانەکان: ٢٠٠٧
  16. پێلاوی ئاڵتونی ئەوروپا – ٢٠٠٧ – ٢٠١٠
  17. باشترین ھێرشبەری ئەوروپای ساڵ: ٢٠٠٧
  18. باشترین یاریزان لە یانەیەکی ئەوروپی: ٢٠٠٧
  19. باشترین یاریزانی جیھانی فیفپرۆ: ٢٠٠٧
  20. دووەم باشترین یاریزانی جیھانی فیفا: ٢٠٠٨
  21. خەڵاتی تۆپی پێی ئاڵتونی: ٢٠٠٨
  22. خوڵاتی پۆشکاش بۆ جوانترین گۆڵ: ٢٠٠٩
  23. گۆڵکاری جامی شای ئیسپانیا: ٢٠١٠
  24. گۆڵکاری خولی ئیسپانی: ٢٠١٠.
  25. گۆڵکاری خولی یانەپاڵەوانەکانی ئەوڕووپای وەرزی ٢٠١٢-٢٠١٣ بەتۆمارکردنی ١٢ گۆڵ
  26. باشترین یاریزانی جیھانی ساڵی ٢٠١٣ (بالۆن دۆر ٢٠١٣)
  • خشتەی ژمارەی گۆلەکانی ڕۆناڵدۆ لەگەڵ ھەڵبژاردەکەی بەپێی ساڵەکانی یاریکردنی
ھەڵبژاردەی پرتووگال ساڵ یاریکردن گۆڵ
٢٠٠٣ ٢ ٠
٢٠٠٤ ١٦ ٧
٢٠٠٥ ١٠ ٢
٢٠٠٦ ١٤ ٦
٢٠٠٧ ١٠ ٥
٢٠٠٨ ٨ ١
٢٠٠٩ ٧ ١
٢٠١٠ ١١ ٣
٢٠١١ ٧ ٥
کۆی گشتی ٨٥ ٣٠

تایبەتمەندییەکان[دەستکاری]

لەڕووی ھێز : ڕۆناڵدۆ لە ڕکابەری شان بە شان دەتوانێت ھەموو بەرگریکارێک بخات کە بیەوێت ، توانای بۆ دەرچوون لە بەرگریکار بە ھێز ھەمیشە ترس دەخاتە دڵی یانەی بەرامبەر ، ھێزی تەنیا لە شان و باڵیدا نیە ئەوەی زیاتر یانەکانی تۆقاندووە لێدانە بەھێزەکانیەتی بە تایبەت لە کاتی جێبەجێکردنی لێدانە ڕاستەوخۆکان .

خاڵی لاوازی : زوو زوو لە ناو یاریگا خۆی دەخات لە کاتێکدا دەتوانێت پشت بەھێز و تواناکانی ببەستێت و بە ھاوسەنگی بمێنیتەوە ، زۆر یاری بە تۆپ دەکات لە کاتێکدا دەتوانێت بە ئاسانی پاسەکە بدات و ھەندێک جار زیاد لە پێویست جوڵانەوە دەکات.

گەورەترین دەستکەوتی : بردنەوەی خولی پاڵەوانەکانی ئەوروپا لەگەڵ مانچستەر لە ٢٠٠٨[٤٢] و بوون بە باشترین یاریزانی جیھان[٤٣] .

خراپترین ئاستی : دۆڕانیان بە یۆنان لە یاری کۆتایی جامی نەتەوەکانی ئەوروپای ٢٠٠٤[٤٤] ، ھەموو جیھان فرمێسکەکانی ڕۆناڵدۆیان لە دوای دۆڕانەکە بینی[٤٥][٤٦].


گالەری[دەستکاری]

کریستیانۆ و تۆڕە کۆمەڵایەتیەکان[دەستکاری]

ھەژماری کریستیانۆ لە تۆڕە کۆمەڵایەتیەکان کە تەنیا لە فەیس بووک نزیکەی ٤٢ ملیۆن و نیو ڵایکی کۆکردۆتەوە ئەوەش ژمارەیەکی پێوانەییە لەڕیزی پێشەوەی پەڕگەکانی فەیس بووک دێت وە لە توویتەریش زۆرتر لە ٨ ملیۆن ھاوڕێی ھەیە


سەرچاوەکان[دەستکاری]

  1. http://www.cristianoronaldo.org.uk/sporting-lisbon/
  2. http://www.independent.co.uk/sport/football/news-and-comment/how-manchester-united-made-cristiano-ronaldo-8490897.html
  3. https://en.wikipedia.org/wiki/Cristiano_Ronaldo#International
  4. http://www.telegraph.co.uk/sport/football/teams/manchester-united/5504059/Cristiano-Ronaldo-Manchester-United-accept-80m-transfer-bid-from-Real-Madrid.html
  5. http://www.telegraph.co.uk/sport/football/players/cristiano-ronaldo/4224600/Cristiano-Ronaldo-wins-Fifa-World-Player-of-the-Year.html
  6. http://www.biography.com/people/cristiano-ronaldo-555730
  7. http://www.kidzworld.com/article/5235-cristiano-ronaldo-biography
  8. http://bleacherreport.com/articles/1321563-cristiano-ronaldo-superstar-is-sad-at-fathers-death
  9. http://books.google.iq/books/about/Moments.html?id=s85rYuI4MFMC&redir_esc=y
  10. http://wagsandgossip.com/2012/07/19/cristiano-ronaldo-sisters-to-open-a-new-cr7-store-in-luxembourg/
  11. http://www.ronaldo7.net/extra/cars/cristiano-ronaldo-cars.html
  12. http://www.chacha.com/question/how-many-languages-does-christiano-ronaldo-speak
  13. http://www.totalprosports.com/2009/06/03/cristiano-ronaldos-new-wag-is-chelsea-players-sister/
  14. http://www.digitalspy.co.uk/showbiz/news/a316189/imogen-thomas-in-love-with-cristiano-ronaldo.html
  15. http://cristianoronaldofan.net/nereida-gallardo-claims-she-know-cristiano-ronaldo-jr-biological-mother/
  16. http://thedirty.com/2008/07/exclusive_interview_with_niki_ghazian_on_cristiano_ronaldo/
  17. http://www.complex.com/sports/2013/02/catchin-bodies-a-history-of-cristiano-ronaldos-alleged-female-conquests/karina-bacchi
  18. http://www.machacas.org/todas-las-fotos-de-mirella-grisales-la-amante-de-cristiano-ronaldo
  19. http://www.interviu.es/galerias/galerias-chicas-de-portada/mirella-grisales-la-amante-de-cristiano-ronaldo
  20. http://www.thesun.co.uk/sol/homepage/showbiz/bizarre/2476901/Ronaldo-scores-with-Paris-Hilton-in-LA-night-club.html
  21. http://www.ronaldo7.net/extra/son/cristiano-ronaldo-son-cristiano-ronaldo-jr.html
  22. http://desportugal.blogspot.com/2009/07/fotogaleria-de-cristiano-ronaldo-desde.html
  23. https://en.wikipedia.org/wiki/C.D._Nacional#Est.C3.A1dio_da_Madeira
  24. http://www.cristianoronaldo.org.uk/sporting-lisbon/
  25. https://en.wikipedia.org/wiki/Cristiano_Ronaldo#Sporting_Clube_de_Portugal
  26. http://home.skysports.com/player.aspx?plid=14937&clid=1&cpid=8
  27. http://web3.cmvm.pt/english/sdi2004/emitentes/docs/fsd6380.pdf
  28. http://www.youtube.com/watch?v=wvmVH2ieK94
  29. http://www.youtube.com/watch?v=DwcwApKkkSs
  30. http://bleacherreport.com/articles/392014-10-things-you-should-know-about-cristiano-ronaldo
  31. http://www.theguardian.com/football/2009/jun/11/cristiano-ronaldo-manchester-united-real-madrid1
  32. http://www.youtube.com/watch?v=s2u1teWaxW8
  33. https://en.wikipedia.org/wiki/UEFA_Euro_2008#Statistics
  34. http://en.wikipedia.org/wiki/UEFA_Euro_2012#Semi-finals
  35. http://en.wikipedia.org/wiki/UEFA_Euro_2012#Statistics
  36. http://www.cristianoronaldo7.net/awards/
  37. https://en.wikipedia.org/wiki/Cristiano_Ronaldo
  38. https://en.wikipedia.org/wiki/Cristiano_Ronaldo#Club_2
  39. http://www.manutd.com/en/players-and-staff/legends/cristiano-ronaldo.aspx
  40. http://www.independent.co.uk/sport/football/news-and-comment/20-years-of-the-premier-league--who-is-the-greatest-player-7648181.html?action=gallery&ino=6
  41. http://www.realmadrid.com/cs/Satellite/en/1193041476158/1202773887674/jugador/Jugador/Cristiano_Ronaldo.htm%0D
  42. http://en.wikipedia.org/wiki/2008_UEFA_Champions_League_Final
  43. http://bleacherreport.com/articles/110178-cristiano-ronaldo-crowned-worlds-best-player-of-2008
  44. http://en.wikipedia.org/wiki/UEFA_Euro_2004_Final
  45. http://www.youtube.com/watch?v=QUc3NJdTEBU
  46. http://www.frequency.com/video/cristiano-ronaldo-crying-euro-2004-final/91225759

بەستەری دەرەکی[دەستکاری]