لڤین
لڤین دامەزراوەیەکی سەربەخۆی ڕۆژنامەوانییە و بارەگای سەرەکی لە شاری سلێمانییە. لە ساڵی ٢٠٠٩ دامەزراوە. دامەزراوەی لڤین لە سێ بەشی سەرەکی پێک دێت. گۆڤاری لڤین، گۆڤارێکی سەربەخۆی سیاسییە و ١٠ ڕۆژ جارێک بە زمانی کوردی دەردەچێت. گۆڤاری لڤینی نوێ، گۆڤارێکی کۆمەڵایەتیی ھونەرییە، مانگانە دەردەچێت. ماڵپەڕی لڤینپرێس، ماڵپەڕێکی ھەواڵییە.
لڤین وەکو دامەزراوەیەکی ڕۆژنامەوانی سەربەخۆ لە ھەرێمی کوردستان، یەکەمین دەزگایە کە خاوەنی پەیمانی شەرەفکاری ڕۆژنامەوانی ھەیە و لە ساڵی ٢٠٠٦ەوە ئەو پەیمانەی بڵاوکردۆتەوە و پێکھاتووە لە کۆمەڵێک بنەمای ئیتیکی و ھەموو ڕۆژنامەنووسەکانی دەزگاکە پێیەوە پابەندن وەکو وردی لە ھەواڵ و زانیاری، پاراستنی سەرچاوەی زانیاری و بڵاونەکردنەوەی بابەتێک کە لە ڕاستی و دروستی زانیارییەکانی دڵنیا نەبن.
گۆڤاری لڤین[دەستکاری]
گۆڤاری لڤین گۆڤارێکی سەربەخۆ و ئازاد و ئەھلییە، پشت بە داھاتی خۆی دەبەستێت لە ڕێگەی بەشداریکردن لە پڕۆسەی بەرھەمھێنان و قازانجەوە. جەختیش لەسەر بەدواداچوونی ڕووداو و گۆڕانکارییەکان دەکاتەوە و گەیاندنی زانیاریی ورد و دروست بە شێوەیەکی بێلایەن و بە پەیڕەوکردن لە بنەماکانی ئیتیکی ڕۆژنامەوانی، بە ئامانجی بەشداریکردن لە پڕۆسەی کامڵکردنی چەمکی (ھاوڵاتیبوون) و چەسپاندنی سیستەمێکی دیموکراسی و شەفافییەت لە بەڕێوەبردنی دامەزراوە دەوڵەتی و حکومی و تایبەتییەکاندا. لە ساڵی ٢٠٠٢ ستافی گۆڤاری لڤین ھەڵسان بە دامەزراندنی دامەزراوەیەکی ڕۆژنامەوانی بە ناوی لڤین و گۆڤاری لڤین بووە بەشێک لە دامەزراوەکە.
لڤین خاوەنی ھیچ ئایدۆلۆژیایەکی تایبەت نییە و بەشێکیش نابێت لە گومانەکانی ھیچ ئایدۆلۆژیایەکی تایبەت. کارەکەی ئەوەیە بە خەڵک بڵێت چی ھەیە، ھەرگیز بە خەڵک ناڵێت چی بکەن.
لڤینی نوێ[دەستکاری]
لڤینی نوێ، گۆڤارێکی کۆمەڵایەتیی ھونەرییە، مانگی جارێک دەردەچێت.
ماڵپەڕی لڤین[دەستکاری]
ماڵپەڕێکی گشتیی ھەواڵییە، ھەواڵی ڕۆژانە و ئەو بابەت و دیمانانەی کە لە گۆڤاری لڤین و لڤینی نوێدا ئەنجام دەدرێت، تیایدا بڵاودەکرێتەوە.